22 лістапада, Мінск /Кар. БЕЛТА/. У сувязі з надыходам замаразкаў ДАІ Мінска рэкамендуе ўсім вадзіцелям праверыць тэхнічны стан аўтамабіляў. Аб гэтым БЕЛТА паведамілі ва УДАІ ГУУС Мінгарвыканкама.
Неабходна праверыць спраўнасць тармазной сістэмы, светлавых прыбораў, шклоачышчальнікаў, устройствы абагравання і абдзімання шкла. Акрамя таго, аўтааматары павінны замяніць летнюю гуму на зімовую.
Дзяржаўтаінспекцыя нагадвае, што дзеючым заканадаўствам прадугледжваецца абавязковае выкарыстанне з 1 снежня па 1 сакавіка зімовых шын на аўтамабілях з тэхнічна дапушчальнай агульнай масай да 3,5 т, легкавых і груза-пасажырскіх аўтамабілях масай звыш 3,5 т, а таксама аўтобусах масай да 5 т. Зімовыя шыны ўстанаўліваюцца на ўсіх колах транспартнага сродку. Шыны, прызначаныя для эксплуатацыі на абледзянелым або заснежаным дарожным пакрыцці, павінны быць абазначаны маркіраваным знакам у выглядзе горнай вяршыні з трыма пікамі і сняжынкай унутры яе або знакамі М+S, М&S, М S або All Seasons.
За нясвоечасовае абсталяванне транспартных сродкаў зімовымі шынамі прадугледжана адміністрацыйная адказнасць у выглядзе штрафу да адной базавай велічыні.
"Зімовая дарога тоіць у сабе шмат непрыемных сюрпрызаў. Таму Дзяржаўтаінспекцыя раіць аўтамабілістам выбіраць больш стрыманы стыль ваджэння на вільготнай або заледзянелай дарозе, пазбягаць выезду на паласу сустрэчнага руху, рэзкіх разгонаў і тармажэнняў. А дарожны знак "Галалёдзіца", які папярэджвае аб участках дарог, на якіх магчымы снежныя заносы, ледзяныя або снежна-ледзяныя ўтварэнні, павінен стаць для вадзіцеляў сігналам да зніжэння скорасці, павелічэння дыстанцыі і бакавых інтэрвалаў да іншых аўтамабіляў. Трэба таксама ўлічваць, што на мастах, пуцеправодах могуць захоўвацца наледзі, паколькі тэмпература дарожнага пакрыцця на такіх участках заўсёды ніжэйшая, чым на звычайных дарогах. Ва ўмовах недастатковай бачнасці рэкамендуецца ўключаць блізкае святло фар", - дадалі ў ДАІ.-0-
