9 красавіка, Мінск /Кар. БЕЛТА/. Для стабілізацыі сітуацыі на дарогах з 10 па 19 красавіка ДАІ правядзе рэспубліканскую прафілактычную акцыю "Цвярозы вадзіцель". Аб гэтым БЕЛТА паведамілі ў галоўным упраўленні Дзяржаўтаінспекцыі МУС.
Акцыя накіравана на своечасовае выяўленне і спыненне фактаў кіравання транспартнымі сродкамі нецвярозымі вадзіцелямі, папярэджанне ДТЗ па іх віне. Нарады ДПС правядуць мэтанакіраваныя адпрацоўкі аўтадарог і вуліц, удзеляць увагу аб'ектам гандлю і ўстановам, якія працуюць у начны час.
Прафілактычныя мерапрыемствы будуць уключаць у сябе інфармацыйна-растлумачальную работу аб недапушчальнасці кіравання транспартам у стане ап'янення і наступствах нецвярозых ДТЗ.
Супрацоўнікі ДАІ наведаюць працоўныя калектывы, раскажуць аб праблеме п'янства за рулём, растлумачаць удзельнікам дарожнага руху адказнасць за парушэнні ПДР і нагадаюць аб сацыяльным праекце "Спыні бяду - пазвані 102", які, дарэчы, дае свае вынікі. Так, прыкладна 20 працэнтаў нецвярозых вадзіцеляў затрымліваюцца па званку неабыякавых людзей.
Са студзеня па сакавік бягучага года за кіраванне транспартным сродкам у стане ап'янення затрыманы 3214 вадзіцеляў. Паўторна на працягу года селі за руль п'янымі 150 чалавек. За гэты час па віне нецвярозых вадзіцеляў учынена 25 ДТЗ, у якіх 4 чалавекі загінулі і 26 атрымалі траўмы. Яшчэ ў 456 ДТЗ пашкоджаны транспартныя сродкі, людзі не пацярпелі.-0-