25 лютага, Мінск /Кар. БЕЛТА/. Да 8 градусаў цяпла чакаецца ў Беларусі ў выхадныя, паведамілі карэспандэнту БЕЛТА ў Рэспубліканскім цэнтры па гідраметэаралогіі, кантролі радыеактыўнага забруджвання і маніторынгу навакольнага асяроддзя Мінпрыроды.
"Пасля кароткачасовага пахаладання ў пачатку тыдня атлантычнае цяпло зноў захапіла ўсю Беларусь. Сёння ў ранішні час адліжнае надвор'е дайшло і на крайні ўсход Магілёўскай вобласці, а ў разгар дня чакаецца ад плюс 4 па ўсходзе да 15 градусаў цяпла па захадзе краіны. Інтэнсіўна растае снег. За суткі ў многіх раёнах яго вышыня зменшылася на 2-6 см. Паводле апошніх даных, вышыня снежнага покрыва ў асноўным складае 1-29 см, у сталіцы - 23 см, на ўсходзе Магілёўскай вобласці яшчэ захоўваюцца сумёты вышынёй 34-47 см", - расказалі ў Белгідрамеце.
У пятніцу, 26 лютага, захаваецца адліжнае надвор'е, але адчуванне цяпла будзе скрадваць заходні, паўднёва-заходні парывісты вецер. У начны час будзе без істотных ападкаў, удзень месцамі пройдуць невялікія кароткачасовыя дажджы. Уначы і раніцай у асобных раёнах будуць клубіцца слабыя туманы, некаторыя ўчасткі дарог застануцца слізкімі. Тэмпература паветра ўначы складзе 1-7 градусаў вышэй за нуль. Удзень будзе 6-12 градусаў цяпла, у паўднёва-заходніх раёнах - да плюс 14.
У суботу і нядзелю, 27-28 лютага, надвор'е ў Беларусі будзе вызначаць няўстойлівая і больш халаднаватая паветраная маса з Балтыйскага мора. Будзе воблачна з праясненнямі. Месцамі па краіне пройдуць кароткачасовыя ападкі (дождж, мокры снег). Уначы і раніцай у асобных раёнах чакаюцца слабыя туман і галалёд, на дарогах месцамі галалёдзіца. Вецер прагназуецца заходні, паўночна-заходні парывісты, у асобных раёнах моцны парывісты, у нядзелю вецер аслабее. У суботу тэмпература паветра ўначы складзе ад мінус 1 да плюс 4, удзень - ад плюс 1 па паўночным усходзе - да 8 градусаў цяпла па паўднёвым захадзе краіны. У нядзелю ўначы будзе ад мінус 4 да плюс 1, удзень - ад нуля да 7 градусаў цяпла.
"У першых чыслах сакавіка цыклоны з актыўнымі франтальнымі раздзеламі будуць перамяшчацца далёка ад нашых меж, таму ападкі чакаюцца толькі месцамі. Заходнія і паўночна-заходнія вятры прадоўжаць пастаўляць цёплае акіянічнае паветра, і ў многіх раёнах чакаецца пераважна адліжнае надвор'е. У ранішні час пры слаба адмоўных тэмпературах асобныя ўчасткі дарог будуць слізкімі", - прагназуюць у Белгідрамеце.-0-
