12 лістапада, Мінск /Кар. БЕЛТА/. Намеснік кіраўніка Адміністрацыі Прэзідэнта Вольга Чупрыс у праграме "Маркаў. Нічога асабістага" на тэлеканале АНТ расказала, як будзе арганізавана грамадскае абмеркаванне праекта новай Канстытуцыі, паведамляе БЕЛТА.
"Прадугледжваецца вельмі шырокі алгарытм работы над Канстытуцыяй на этапе абмеркавання. Мы яго апрабавалі, калі распрацоўвалі праекты законаў аб унясенні змяненняў у кодэксы па пытаннях адміністрацыйнай адказнасці. Плануем прыблізна такі ж алгарытм", - расказала Вольга Чупрыс.
Паводле яе слоў, цяпер распрацоўваецца парадак абмеркавання праекта новай Канстытуцыі. Курыраваць гэту работу будзе Нацыянальны цэнтр прававой інфармацыі, дакумент будзе размешчаны на Нацыянальным прававым інтэрнэт-партале. "Можна будзе падаць электронны зварот, прапанову, можна будзе адправіць яе па пошце", - адзначыла намеснік кіраўніка Адміністрацыі Прэзідэнта.
Спецыяльны банер, які заклікае да абмеркавання новай Канстытуцыі, будзе размешчаны на сайтах усіх дзяржаўных органаў. "Вядома, будуць задзейнічаны пляцоўкі абласных, Мінскага гарадскога выканаўчага камітэта. Безумоўна, установы адукацыі, таму што там сканцэнтравана моладзь, нам важна атрымаць меркаванне. Гэта значыць плануецца вельмі вялікая работа і шырокае абмеркаванне. Усе прапановы будуць прагледжаны, прааналізаваны і па магчымасці ўлічаны", - заявіла Вольга Чупрыс.-0-
