13 студзеня, Мінск /Кар. БЕЛТА/. Паводле прагнозаў, сярэднясутачная тэмпература будзе паніжацца да выхадных, і Беларускі Чырвоны Крыж разгортвае ва ўсіх рэгіёнах краіны кампанію дапамогі самым слабаабароненым катэгорыям грамадзян у экстрэмальных зімовых умовах. Больш падрабязна аб гэтым карэспандэнту БЕЛТА расказаў афіцыйны прадстаўнік БТЧК Віталь Дэмбоўскі.
Для аператыўнага рэагавання ўсім абласным структурам БТЧК і мінскай гарадской, а таксама Дарожнай арганізацыі БЧ БТЧК раней было даручана ацаніць патрэбнасці ў дапамозе ў сваіх рэгіёнах, скласці план дзеянняў і падрыхтаваць людзей і тэхніку для работы ў зімовых экстрэмальных умовах, сфарміраваць запасы з рэсурсаў службы па рэагаванні на надзвычайныя сітуацыі і пошуку БТЧК.
"Меры рэагавання залежаць ад тэмпературы. Так, пры яе паніжэнні на працягу дня да мінус 15 градусаў і ніжэй Чырвоны Крыж праводзіць акцыі: аказвае гуманітарную дапамогу слабаабароненым слаям насельніцтва. Калі слупок тэрмометра апускаецца ніжэй за адзнаку мінус 25 градусаў, то адбываецца разгортванне цэнтраў абагрэву на базе ўсіх раённых арганізацый. Пры іх кругласутачна дзяжурыць валанцёр або спецыяліст па падрыхтоўцы і рэагаванні на надзвычайныя сітуацыі", - сказаў Віталь Дэмбоўскі.
Паводле яго слоў, камплектацыя мабільных пунктаў абагрэву ўзгадняецца з гарадскімі выканкамамі. Звычайна гэта палатка, генератар, тытан або чайнікі, аднаразовы посуд, чай, кансервы, запас цёплага адзення і абутку.
Па месцах знаходжання бяздомных пры нізкіх тэмпературах арганізуюцца рэйды мабільных груп. Тым, хто мае патрэбу, раздаюць коўдры, цёплыя рэчы і абутак, прадуктовыя наборы.
На базе раённых арганізацый БТЧК таксама дзейнічаюць пункты абагрэву: тут насельніцтва можа атрымаць гарачае пітво і першую дапамогу пры абмарожаннях.
У маразы дапамога патрабуецца і аўтаўладальнікам, якія завязнулі на дарозе. У Чырвонага Крыжа ёсць вопыт мабілізацыі валанцёрскіх груп, якія прыходзяць на дапамогу ў такіх сітуацыях: у рэгіёнах цяпер прапрацоўваюць гэта пытанне.
"У цэлым, мы стараемся актыўна прыцягваць да рэалізацыі мерапрыемстваў каманды рэагавання і валанцёрскія групы, сфарміраваныя ў абласных арганізацыях БТЧК", - сказаў на заканчэнне Віталь Дэмбоўскі.-0-
