4 снежня, Мінск /Кар. БЕЛТА/. БРСМ плануе развіваць у Беларусі праект "Маладзёжны ўрад", паведаміла карэспандэнту БЕЛТА кіраўнік міжнароднага пратакола Цэнтральнага камітэта БРСМ Алеся Сазанкова.
"БРСМ плануе развіваць у Беларусі праект "Маладзёжны ўрад" з мэтай навучання маладых прафесіяналаў для работы на дзяржаўнай службе. Каб пераняць вопыт лепшых практык у гэтым напрамку, наша каманда была накіравана на III Усерасійскі форум органаў маладзёжнага самакіравання "Маладзёжная каманда краіны", які прайшоў з 27 па 30 лістапада ў Казані, і прыняла ўдзел у рабоце міжнароднай пляцоўкі форуму "Маладзёжнае самакіраванне: лепшыя практыкі". Адбылася прэзентацыя краін - удзельніц форуму. У прыватнасці, свае напрацоўкі прадставілі Арменія і Беларусь. Акрамя таго, удзельнікі правялі інтэрактыўную сесію па ўнясенні прапаноў па дадатковых напрамках работы маладзёжных урадаў", - расказала Алеся Сазанкова.
Паводле яе слоў, асаблівае значэнне ўдзяляецца ўмацаванню дружалюбных адносін і развіццю супрацоўніцтва ў галіне рэалізацыі маладзёжнай палітыкі. "У бягучым годзе маладзёжныя арганізацыі Беларусі і Татарстана пачалі актыўнае ўзаемадзеянне. Адбыўся шэраг візітаў у Казань, прайшлі двухбаковыя сустрэчы, прадстаўнікі саюза моладзі прымалі ўдзел у маладзёжных форумах. Для развіцця далейшых кантактаў БРСМ, Асацыяцыя маладзёжных урадаў Расіі, Маладзёжны ўрад Татарстана выступілі з ініцыятывай падпісання пагадненняў аб супрацоўніцтве", - адзначыла кіраўнік міжнароднага пратакола.
Алеся Сазанкова падкрэсліла, што цырымонія падпісання двухбаковых дакументаў запланавана на 12 снежня. "Мэтай гэтага пагаднення стане забеспячэнне ўзаемадзеяння маладзёжных урадаў краін СНД і найбольш паспяховых маладзёжных арганізацый, сустрэчы на значных пляцоўках, а таксама рэалізацыя сацыяльных праектаў, - сказала яна. - Адносіны нашых арганізацый у галіне рэалізацыі маладзёжнай палітыкі маюць высокі патэнцыял. Яны нацэлены на фарміраванне ў моладзі актыўнай жыццёвай пазіцыі, уключэнне яе ў грамадскае, палітычнае, сацыяльнае і эканамічнае жыццё і міждзяржаўнае супрацоўніцтва".-0-
