5 лютага, Мінск /Кацярына Марковіч - БЕЛТА/. Больш за 10 тыс. кватэр плануецца пабудаваць у Беларусі для шматдзетных сем'яў у 2020 годзе. Аб гэтым паведаміў намеснік прэм'ер-міністра Беларусі Уладзімір Кухараў, адказваючы на пытанні журналістаў перад пачаткам калегіі Мінбудархітэктуры, перадае карэспандэнт БЕЛТА.
"У мінулым годзе мы пабудавалі каля 12 тыс. кватэр для шматдзетных сем'яў, акрамя таго, 14,5 тыс. шматдзетных сем'яў былі накіраваны на будаўніцтва. У гэтым годзе пастаўлена задача пабудаваць 10,5 тыс. такіх кватэр і амаль 15,5 тыс. шматдзетных сем'яў накіраваць на будаўніцтва жылля", - адзначыў віцэ-прэм'ер. Гэта дасць магчымасць ужо з 2021 года шматдзетным сем'ям знаходзіцца ў чарзе на атрыманне жылля не больш за год, растлумачыў ён.
Таксама намеснік прэм'ер-міністра пракаменціраваў развіццё гарадоў-спадарожнікаў Мінска: "Сёння мы бачым, што ў Мінску практычна адсутнічаюць тэрыторыі для будаўніцтва, таму ў мінулым годзе кіраўніком дзяржавы былі падпісаны тры нарматыўныя акты, якія далі магчымасць вырашыць усе праблемныя пытанні развіцця гарадоў-спадарожнікаў". Так, сёння вядзецца будаўніцтва ў Смалявічах, дзе ў маі гэтага года з'явіцца пілотны дом, кватэры ў якім атрымаюць амаль 30 шматдзетных сем'яў.
"Усім маючым патрэбу незалежна ад часу пастаноўкі на ўлік дазволена падаваць дакументы на будаўніцтва ў гарадах-спадарожніках. У гэтым годзе мы плануем узвесці каля 12 дамоў у двух мікрараёнах Смалявіч. Таксама пачалося будаўніцтва дзіцячага сада, школы, у гэтым годзе пачнём будаваць паліклініку. Вядзецца рэканструкцыя дарогі Р53 да Смалявіч", - расказаў Уладзімір Кухараў.
Паводле слоў віцэ-прэм'ера, у гэтым годзе плануецца сур'ёзна заняцца развіццём горада-спадарожніка Рудзенска. "Гэты горад мае вялікую перспектыву. Але не будзем забываць, што і ўсе астатнія гарады-спадарожнікі таксама развіваюцца. Дадзена заданне праектным арганізацыям у бягучым годзе перапрацаваць праектную дакументацыю, якая дасць магчымасць арганізаваць там больш інтэнсіўныя будаўнічыя работы", - заявіў Уладзімір Кухараў.-0-