27 студзеня, Мінск /Кар. БЕЛТА/. Беларускія палярнікі павіншавалі краіну з Днём навукі і 100-годдзем беларускай акадэмічнай навукі, паведамілі БЕЛТА ў прэс-службе НАН.
Ад імя ўдзельнікаў 14-й Беларускай антарктычнай экспедыцыі начальнік экспедыцыі Аляксей Гайдашоў прыслаў віншаванне ўсім вучоным, даследчыкам і работнікам навуковай сферы краіны. "100 гадоў таму была створана першая дзяржаўная навуковая ўстанова рэспублікі - Інстытут беларускай культуры, што паслужыла кропкай адліку гісторыі станаўлення і развіцця нацыянальнай акадэмічнай навукі. За векавую гісторыю беларуская навука ўзбагаціла свет цэлай плеядай выдатных вучоных, адкрыццямі сусветнага значэння, незвычайнымі вынаходствамі і сучаснымі тэхналогіямі, аказала вялікі ўплыў на развіццё нашага грамадства і краіны ў цэлым. Сучаснае пакаленне беларускіх вучоных паспяхова прадаўжае і развівае слаўныя традыцыі сваіх папярэднікаў. Ваша праца і бясцэнны багаж ведаў - аснова дабрабыту і дзяржаўнасці нашай краіны, чыё існаванне немагчыма ўявіць без навукова-тэхнічнага развіцця", - гаворыцца ў віншаванні.
Юбілейны год нацыянальнай акадэмічнай навукі палярнікі сустракаюць у Антарктыцы новымі навуковымі і тэхнічнымі дасягненнямі. Паспяхова рэалізуецца нацыянальная праграма навуковых даследаванняў і міжнародныя праекты, укараняюцца сучасныя прыборныя комплексы і вымяральныя сістэмы, створаныя беларускімі вучонымі, уведзены ў эксплуатацыю новыя сродкі транспарту і сувязі, праводзіцца комплекс інжынерна-тэхнічных работ па падрыхтоўцы першай чаргі Беларускай антарктычнай станцыі да пераходу на круглагадовае функцыянаванне.
"Рэалізацыя праектаў такога маштабу і ўзроўню пад сілу толькі той краіне, якая праводзіць паслядоўную палітыку міру і згоды, дбае пра перспектыву свайго дынамічнага развіцця і інтэлектуальнага прагрэсу, мае багаты навуковы патэнцыял і працавіты народ. Навука - гэта тое, што падымае нашы галовы вышэй, а праца вучонага - гэта заўсёды цікавая нялёгкая праца, якая ва ўсе часы, нягледзячы ні на што, выклікае глыбокую павагу. Дзякуй вам за адданасць навуцы, за вашу актыўную мэтанакіраваную працу, за ўклад у айчынную і сусветную навуку", - сказалі палярнікі.
"Няхай навука ў нашай краіне развіваецца і прыцягвае ўсё больш і больш таленавітых, вынаходлівых і мэтанакіраваных людзей, а ваша высакародная праца не застанецца незаўважанай і будзе адзначана па заслугах усеагульным прызнаннем. Жадаем вялікіх мэт і памкненняў, вялікіх магчымасцей і прарываў, смелых ідэй і ўчынкаў, геніяльных думак і адкрыццяў, міру, моцнага здароўя і шчасця!" - сказана ў віншаванні.
У гонар 100-гадовага юбілею беларускай акадэмічнай навукі на флагштоках нацыянальнай даследчай станцыі ў Антарктыдзе падняты Дзяржаўны сцяг Рэспублікі Беларусь і сцяг лідара перадавой навуковай думкі краіны - Нацыянальнай акадэміі навук.
Як паведамлялася, 15 лістапада 2021 года ў НАН Беларусі быў дадзены ўрачысты старт 14-й Беларускай антарктычнай экспедыцыі. У гэтым годзе на лядовы кантынент адправіліся 11 чалавек. У складзе экспедыцыі навуковыя супрацоўнікі НАН Беларусі (Рэспубліканскага цэнтра палярных даследаванняў, Інстытута фізікі, Аб'яднанага інстытута праблем інфарматыкі, НПЦ НАН Беларусі па біярэсурсах), БДУ (Нацыянальнага навукова-даследчага цэнтра маніторынгу азанасферы) і іншых арганізацый краіны. У камандзе як спецыялісты, якія пабывалі ўжо ў Антарктыдзе, так і навічкі. Беларускія палярнікі пачалі навуковыя даследаванні ў Антарктыдзе ў снежні 2021 года.-0-
