Балет, лозапляценне і свой паштамт. Мазыр прымае "Марафон адзінства"

27 снежня, Мазыр /Кар. БЕЛТА/. Рэспубліканская грамадска-культурная акцыя "Марафон адзінства" стартуе сёння ў Мазыры, паведамілі БЕЛТА ў аргкамітэце.

Праграма бліжэйшых двух дзён стане пераднавагоднім падарункам для гэтага кутка Палесся. Першы дзень адкрывае выстава Нацыянальнай бібліятэкі Беларусі "Кнігі ў дар Прэзідэнту". У экспазіцыі - больш за 50 выданняў са збору Палаца Незалежнасці, Прэзідэнцкай бібліятэкі Рэспублікі Беларусь і Нацыянальнай бібліятэкі. Гэта частка калекцыі кніг, падораных кіраўніку дзяржавы прадстаўнікамі краін блізкага і далёкага замежжа, культурнымі і дзярждзеячамі.

У свет вытанчанага мастацтва і тытанічнай працы запросіць выстава Нацыянальнага акадэмічнага Вялікага тэатра оперы і балета Рэспублікі Беларусь "Вялікі тэатр Беларусі: Гісторыя. Ідэі. Здзяйсненні".

Першы дзень "Марафону адзінства" ў горадзе на Прыпяці падорыць незабыўныя сустрэчы і майстар-класы. Вядучыя майстры сцэны Вялікага тэатра Беларусі падзеляцца вопытам, адкажуць на пытанні, некага натхняць і чарговы раз парадуюць сваёй творчасцю з антуражам лёгкасці. У Мазырскім драматычным тэатры імя І.Мележа майстар-клас па класічным танцы правядзе народная артыстка Беларусі, прыма-балерына Ірына Яромкіна, па сучасным танцы - харэограф-пастаноўшчык Анастасія Голешава. А салісты оперы і аркестра прадэманструюць сваё майстэрства ў музычным каледжы.

У Мазырскім краязнаўчым музеі разгорнецца выстава-продаж "Зямля таленавітых людзей", якая прэзентуе багацце ідэй і ўнікальнасць вырабаў майстроў-рамеснікаў паўднёва-ўсходняга рэгіёна. Тут будзе прадстаўлена мастацтва выцінанкі, унікальная неглюбская народная тэкстыльная традыцыя, разьба па дрэве, ткацтва, роспіс па шкле, тканіне, дрэве, сожская скань. Не абыдзецца і без легендарнага слуцкага пояса. Жадаючыя далучыцца да рамяства змогуць гэта зрабіць на майстар-класах салома- і лозапляцення.

У раскладзе Мазырскага музычнага каледжа і Мазырскага будаўнічага каледжа незвычайны для ўстановы фармат - "НЕсумная НЕлекцыя" з удзелам намесніка міністра адукацыі Кацярыны Пятруцкай і іншых спікераў-НЕлектараў.

Нібы прывітанне з будучыні - інтэрактыўная пляцоўка "У будучыню - разам!", якая прэзентуе патэнцыял Нацыянальнага дзіцячага тэхнапарка і дзіцячага цэнтра навуковых адкрыццяў "Інапарк" Гомельскага абласнога цэнтра тэхнічнай творчасці дзяцей і моладзі. Медыцынскія інавацыі і ноу-хау прадставіць выстава Міністэрства аховы здароўя "Беларусь. Медыцына. Будучыня".

На прадпрыемствах "Мазырскія малочныя прадукты", "Беларускабель", "Калінкавіцкі мясакамбінат" і Мазырскі ДАК гэты пятнічны дзень стане самым яркім і гучным. Тут разгорнуцца імправізаваныя сцэны праекта "Разам працуем, разам спяваем!".

Дыялог калектываў двух тытанаў раёна - прамысловага і сельскагаспадарчага - Мазырскага НПЗ і саўгаса-камбіната "Зара" запланаваны на базе нафтаперапрацоўшчыкаў. А на ААТ "Мазырсоль" запрошаны калегі з РУП "Беларуснафта Гомельаблнафтапрадукт".

Самая кранальная і чароўная частка дня - акцыя "Цяпло нашых сэрцаў" ад арганізатараў "Марафону адзінства". Гэта час здзяйснення жаданняў і падарункаў, выступлення артыстаў і блогераў у Мазырскім дзіцячым доме.

БЕЛТА прадставіць дзве выставы: "Беларусь. Узлёт" у гандлёвым цэнтры "Катапульта" і "Суверэнная Беларусь" у фізкультурна-аздараўленчым цэнтры "Палессе-Арэна".

Не менш насычаны на падзеі і мерапрыемствы другі дзень "Марафону" ў Мазыры. Самы чаканы пункт афішы - канцэртная праграма "Час выбраў нас" на сцэне ў ФАЦ "Палессе-Арэна".

На памяць гораду застанецца маштабны мурал "Будучыня Беларусі ў тваіх руках", які адкрыюць ва ўрачыстай абстаноўцы. А вось праверыць веды па гісторыі і сучаснасці любімай Беларусі дасць магчымасць гарадскі квест "Гэта ўсё маё роднае".

Намечана і "Знакавая сустрэча" на фуд-корце гандлёвага цэнтра "Катапульта".

Будзе на "Марафоне" і свой паштамт. Сумесная акцыя "Навагодняя паштоўка" ад арганізатараў "Марафону адзінства" і РУП "Белпошта" дасць гасцям свята магчымасць выбраць навагоднюю паштоўку, падпісаць яе і са спецыяльным штэмпелем "Марафон адзінства. Мазыр" бясплатна адправіць яе па любым адрасе.

Завершыць насычаны суботні дзень вячэрняя дыскатэка.