19 лістапада, Мінск /Кар. БЕЛТА/. Трэба ўключыць у агульнанацыянальны дыялог як мага больш беларусаў, заявіў старшыня Палаты прадстаўнікоў Уладзімір Андрэйчанка на пасяджэнні чацвёртай сесіі Палаты прадстаўнікоў Нацыянальнага сходу сёмага склікання, перадае карэспандэнт БЕЛТА.
"Асенняя сесія прадаўжае сваю работу. І галоўнай задачай для нас застаецца паслядоўная рэалізацыя намечаных заканадаўчых планаў. У той жа час мы не можам заставацца ўбаку ад вырашэння тых праблем, якімі жыве сёння краіна. І безумоўным прыярытэтам тут з'яўляецца падрыхтоўка да маючага адбыцца Усебеларускага народнага сходу. Перш за ўсё, нам неабходна завяршыць абагульненне прапаноў, якія паступілі ў Палату прадстаўнікоў, і накіраваць іх у рэспубліканскі аргкамітэт па падрыхтоўцы форуму", - сказаў Уладзімір Андрэйчанка.
Разам з тым, паводле яго слоў, той шырокі дыялог, які вядзецца цяпер на розных дыскусійных платформах з удзелам парламентарыяў, павінен прадаўжацца. "Трэба ўключыць у гэты працэс як мага больш беларусаў, паколькі менавіта такім чынам кожны грамадзянін можа сёння аказаць рэальны ўплыў на прыняцце рашэнняў, якія маюць прынцыповае значэнне для будучага краіны", - адзначыў спікер.
Уладзімір Андрэйчанка падкрэсліў: неабходна выслухаць усіх удзельнікаў дыялогу, незалежна ад іх палітычных перакананняў.
"Арганізатары беспарадкаў актыўна штурхаюць людзей на ўсё больш радыкальныя, неабдуманыя дзеянні. Іх першапачатковая стаўка была зроблена на раскол улады. Жорсткі псіхалагічны націск зведалі прадстаўнікі многіх дзяржаўных органаў, у тым ліку і парламентарыі. Але калі гэты план не спрацаваў, пераключыліся на іншыя, не менш брудныя метады вядзення інфармацыйнай вайны, - канстатаваў ён. - Кампанія па дыскрэдытацыі дзяржаўных сімвалаў прывяла да гібелі чалавека. Але правакатарам і гэтага мала. Яны ўжо спрабуюць уцягнуць у канфлікт вернікаў і распаліць рэлігійную варожасць".
Спікер дадаў: не спыняюцца спробы ўнушыць грамадству думку, што беларуская эканоміка з яе ідэяй сацыяльнай справядлівасці неэфектыўная. "Хоць аб'ектыўная інфармацыя сведчыць аб зусім іншым", - сказаў на заканчэнне ён.-0-
