19 ліпеня, Мінск /Кар. БЕЛТА/. Маштабны велапрабег, прымеркаваны да 80-годдзя Перамогі ў Вялікай Айчыннай вайне і 900-годдзя з дня заснавання Полацкага жаночага манастыра, завяршыўся каля Храма-помніка ў гонар Усіх святых у Мінску, перадае карэспандэнт БЕЛТА.
Сёння ўдзельнікі прабегу пераадолелі чатыры маршруты. Групы веласіпедыстаў стартавалі ад мемарыяла "Памяць", стэлы "Мінск - горад-герой", мемарыяла-могілак ахвярам канцлагера Шталаг-352, мемарыяльнага комплексу "Трасцянец: урочышча "Благаўшчына". На кожнай з кропак удзельнікі велапрабегу ўсклалі кветкі да помнікаў. Пераадолеўшы маршруты, усе велааматары прыбылі да Храма-помніка ў гонар Усіх святых, дзе потым прайшоў малебен.
"Удзел у гэтым велапрабегу я прысвячаю свайму дзядулю, які быў паранены на Вялікай Айчыннай вайне, - сказаў Ігар Саюк з Брэста, адзначыўшы, што з задавальненнем далучыцца да такога мерапрыемства ў будучым. - Скорасць была камфортнай. Ехалі разам з добрымі людзьмі, з сябрамі, размаўлялі".
"Удзельнікі велапрабегу прыбылі ў Мінск, нягледзячы на няпростыя ўмовы надвор'я. Мерапрыемства суправаджалася наведваннем знакавых для нашай краіны мясцін, звязаных з Вялікай Айчыннай вайной. Мы дзякуем Богу за мірнае неба, молімся аб спачыўшых і разам з тым усведамляем, што нам трэба многае зрабіць для захавання таго здабытку, які быў перададзены ад папярэдніх пакаленняў, захавання міру, згоды, яднання ў нашым грамадстве. Трэба ўпрыгожыць краіну ў Год добраўпарадкавання і пастарацца, каб нашы душы былі ўпрыгожаны дабрадзейнасцю", - падкрэсліў Мітрапаліт Мінскі і Заслаўскі Веніямін, Патрыяршы Экзарх усяе Беларусі.
Міністр спорту і турызму Сяргей Кавальчук адзначыў, што такім мерапрыемствам удзельнікі могуць аддаць даніну памяці і павагі тым воінам, якія ахвяравалі сваімі жыццямі дзеля міру і спакою. "Я ўпэўнены, што такія мерапрыемствы будуць садзейнічаць стваральнай працы, сіле нашай дзяржавы, спартсменаў і ўсіх беларусаў", - дадаў міністр.
Пасля завяршэння малебна Сяргей Кавальчук і мітрапаліт Веніямін падпісалі план мерапрыемстваў па комплексным развіцці і папулярызацыі турыстычнага патэнцыялу рэлігійных аб'ектаў Мінска і Мінскай вобласці.
Маштабны велапрабег прайшоў у два этапы па тэрыторыі Брэсцкай, Віцебскай, Гродзенскай і Мінскай абласцей. Старт мерапрыемству быў дадзены 14 ліпеня ў Брэсцкай крэпасці-героі.
Арганізатарамі велапрабегу выступілі Міністэрства спорту і турызму, Беларуская праваслаўная царква, упаўнаважаны па справах рэлігій і нацыянальнасцей, аблвыканкамы і райвыканкамы. Ён праводзіўся сярод аматараў веласіпедных відаў спорту ва ўзросце ад 18 гадоў.-0-
Фота Сяргея Шэлега і Мінспорту
Падпісвайцеся на нас у
