24 красавіка, Мазырскі раён /Кар. БЕЛТА/. У кожным раёне Беларусі трэба аднавіць сельгастэхнікі. Аб гэтым Прэзідэнт Беларусі Аляксандр Лукашэнка заявіў у ходзе рабочай паездкі ў Мазырскі раён Гомельскай вобласці, перадае карэспандэнт БЕЛТА.
Наведваючы прадпрыемства "Мазыртэхсэрвіс", беларускі лідар указаў на неабходнасць аднаўлення сельгастэхнік. Размова ідзе пра спецыялізаваныя арганізацыі, якія займаюцца тэхнічным абслугоўваннем, рамонтам, мантажом абсталявання, а таксама забеспячэннем сельскагаспадарчых прадпрыемстваў тэхнікай і запаснымі часткамі.
"Нам трэба кроў з носа аднавіць сельгастэхнікі. Працаваць, працаваць і аднавіць у кожным раёне", - падкрэсліў Аляксандр Лукашэнка.
Кіраўнік дзяржавы звярнуў увагу, што значнай частцы сельскагаспадарчых прадпрыемстваў патрэбна дапамога па рамонце тэхнікі. Гэта звязана не толькі з ускладненнем тэхнікі, але і з кадравым пытаннем. "Ужо няма тых сівавалосых старых людзей. Яны, можа, недзе і ёсць. Іх трэба прасіць, каб яны прыйшлі, дапамаглі, параілі, падтрымалі слесараў-рамонтнікаў, - канстатаваў ён. - Важна цяпер гэта падхапіць, каб старыя людзі навучылі моладзь, каб гэта перадаць".
Разам з тым, падкрэсліў Прэзідэнт, гэтыя арганізацыі па рамонце тэхнікі не абавязкова павінны быць такімі ж маштабнымі, як "Мазыртэхсэрвіс", які кіраўнік дзяржавы параўнаў з паўнацэнным заводам.
"Як мяне інфармуюць, Мазыр (гаворка пра прадпрыемства "Мазыртэхсэрвіс". - Заўвага БЕЛТА) працуе як завод па пэўных напрамках на многія раёны. Але ў Івана Іванавіча (старшыні Гомельскага аблвыканкама Івана Крупко. - Заўвага БЕЛТА) шмат праблем у іншых раёнах, таму нам трэба аднаўляць гэтыя сэрвісы", - сказаў Аляксандр Лукашэнка.
Кіраўнік дзяржавы заўважыў, што такія арганізацыі (раней - сельгастэхнікі, а цяпер райаграсэрвісы) могуць аказваць дапамогу ў рамонце не толькі сельгасарганізацыям, але і людзям.-0-
Падпісвайцеся на нас у
