Фота з архіва
22 красавіка, Мінск /Кар. БЕЛТА/. У Беларусі трэба ўзмацніць падыходы пры навучанні вадзіцеляў у аўташколах. Такое даручэнне кіраўнік дзяржавы Аляксандр Лукашэнка даў у час наведвання Мінскага аэраклуба ДТСААФ на аэрадроме Ліпкі, перадае карэспандэнт БЕЛТА.
Адным з відаў дзейнасці ДТСААФ з'яўляецца падрыхтоўка вадзіцеляў розных катэгорый (амаль 45 тыс. чалавек у год), і гэта прыносіць добры даход. Аляксандр Лукашэнка заўважыў, што і сам у свой час навучаўся менавіта ў аўташколе ДТСААФ.
Прэзідэнт звярнуў увагу, што трэба ўзмацняць якасць падрыхтоўкі будучых вадзіцеляў, паколькі гэта ў першую чаргу пытанне бяспекі на дарогах: "Трэба ўзмацняць падрыхтоўку вадзіцеляў. У нас хто толькі ні ездзіць сёння на аўтамабілі".
Аляксандр Лукашэнка падкрэсліў, што ён выступае за тое, каб магчымасць прайсці навучанне ў аўташколе прадастаўлялася ўсім жадаючым - і мужчынам, і жанчынам. Аднак каб стаць вадзіцелем, трэба валодаць не толькі спецыяльнымі навыкамі, але і прыроднымі данымі: быць уважлівым, сабраным і да т.п.
Прэзідэнт звярнуў увагу, што пэўныя меры трэба прымаць не для таго, каб адсячы, адсеяць як мага больш людзей, а менавіта з акцэнтам на якасць падрыхтоўкі і праверку навыкаў ваджэння.
"Мы гэта ўсведамляем, Аляксандр Рыгоравіч. І тое, што апошнім часам робіцца на дарогах... Мы рэалізуем сумесны праект з ДАІ, Мінтрансам (Міністэрствам транспарту і камунікацый. - Заўвага БЕЛТА). Працуе адпаведная камісія для таго, каб выпрацаваць комплекс мер з мэтай павысіць бяспеку на нашых дарогах, - далажыў старшыня ЦС ДТСААФ Андрэй Некрашэвіч. - Наша роля і ўдзел заключаецца ў тым, каб павысіць якасць навучання. Мы не чакаем указанняў зверху".
"У вас усё для гэтага ёсць", - канстатаваў кіраўнік дзяржавы.
"Каб мы дастойных вадзіцеляў рыхтавалі, каб яны маглі на дарогі выязджаць на аўтамабілі, - сказаў Прэзідэнт. - Як бы яны на мяне сёння ні пакрыўдзіліся, калі пачуюць гэты спіч. Яны будуць мне ўдзячныя, таму што жыць жа будуць".-0-
Падпісвайцеся на нас у
