18 лютага, Мінск /Міхаіл Маціеўскі - БЕЛТА/. Беларусь заўсёды будзе надзейным партнёрам Еўрапейскага саюза і разлічвае, што такі падыход у двухбаковых адносінах будзе ўзаемным. Аб гэтым Прэзідэнт Беларусі Аляксандр Лукашэнка заявіў сёння на сустрэчы з еўрапейскім камісарам па бюджэце і чалавечых рэсурсах Гюнтэрам Этынгерам, перадае карэспандэнт БЕЛТА.
"Я хачу вас запэўніць, што Беларусь у адносінах да сваіх суседзяў заўсёды прытрымліваецца вельмі ўзважанай і акуратнай палітыкі. Мы лічым, што суседзі ад госпада, іх не выбіраюць, таму з імі трэба будаваць добрыя адносіны. Зыходзячы з гэтага, мы заўсёды будзем надзейным партнёрам Еўрапейскага саюза, і за беларускі напрамак (амаль паўтары тысячы кіламетраў) вы можаце не хвалявацца. Вядома ж, мы хочам, каб такія пачуцці былі ўзаемнымі", - сказаў Аляксандр Лукашэнка.
Прэзідэнт адзначыў, што адносіны паміж Беларуссю і Еўрасаюзам ва ўсіх сферах грунтуюцца на пэўных прынцыпах і развіваюцца па пэўных напрамках. "Развіццю гэтых напрамкаў служаць праграмы, якія мы з вамі прымаем, і праекты, якія рэалізуем. Апошнім часам значна павялічылася фінансаванне такіх праектаў з боку Еўрапейскага саюза. Зразумела, што яны маюць узаемавыгадны характар. Давайце будзем рухацца ў гэтым напрамку", - прапанаваў кіраўнік дзяржавы.
У сваю чаргу Гюнтэр Этынгер адзначыў, што знаходзіцца ў Мінску з учарашняга вечара і з задавальненнем наведвае Беларусь. "Я ўспамінаю, як пяць гадоў таму ўжо меў магчымасць наведаць Мінск для ўдзелу ў вялікай канферэнцыі па лініі Еўразійскага эканамічнага саюза. Але першае маё ўражанне пра Беларусь бярэ пачатак яшчэ з 1960-х гадоў, калі маці прымушала мяне займацца на фартэпіяна з беларускай выкладчыцай на працягу васьмі гадоў. Я з вялікім задавальненнем гуляў бы ў футбол, але мне даводзілася займацца гэтым", - расказаў ён.
Сёння ў еўракамісара запланаваны таксама перагаворы з прэм'ер-міністрам Сяргеем Румасам, міністрам фінансаў Максімам Ермаловічам і намеснікам міністра замежных спраў Алегам Краўчанкам. На сустрэчах бакі плануюць разгледзець развіццё палітычнага дыялогу і гандлёва-эканамічнага супрацоўніцтва паміж Беларуссю і ЕС, узаемадзеянне ў фінансавай і мытнай сферах. "Я рады гэтым перагаворам і таму, што нам трэба будзе абмеркаваць", - падкрэсліў Гюнтэр Этынгер.-0-
