Сцяг Серада, 12 чэрвеня 2024
Усе навіны
Усе навіны
Прэзідэнт
11 красавіка 2024, 11:09

Лукашэнка: Беларусь і Узбекістан паставілі перад сабой амбіцыйныя мэты і не маюць намеру адступаць ад іх

11 красавіка, Мінск /Кар. БЕЛТА/. Беларусь і Узбекістан паставілі перад сабой амбіцыйныя мэты і не маюць намеру адступаць ад іх. Аб гэтым Прэзідэнт Беларусі Аляксандр Лукашэнка заявіў на сустрэчы з міністрам замежных спраў Узбекістана Бахціёрам Саідавым, перадае карэспандэнт БЕЛТА.

Кіраўнік дзяржавы ў першую чаргу падзякаваў Бахціёру Саідаву за гасціннасць, якая была аказана ўзбекскім бокам у час нядаўняга афіцыйнага візіту Прэзідэнта Беларусі ў Ташкент, а таксама перадаў самыя добрыя пажаданні і ўдзячнасць узбекскаму лідару Шаўкату Мірзіёеву.

"Мы паставілі тады перад сабой амбіцыйныя планы - дасягнуць абароту ў гандлі мільярд долараў. Я думаю, што ў нас часу няма для таго, каб некуды адступаць, ды і не трэба. Мы гатовы адыграць сваю ролю, спадзяюся, што і Узбекістан таксама прыкладзе максімум намаганняў", - сказаў Аляксандр Лукашэнка.
Прэзідэнт таксама выказаў удзячнасць Узбекістану за падтрымку Беларусі на яе шляху да членства ў Шанхайскай арганізацыі супрацоўніцтва.

"Асаблівую ўвагу прашу вас звярнуць на стварэнне сумесных прадпрыемстваў, аб якіх мы дамаўляліся. Мы гаварылі тады пра БЕЛАЗ і гэтак далей. Давайце будзем прадметна ў гэтым напрамку працаваць. Мы ў гэтым зацікаўлены. У нас ёсць што прапанаваць Узбекістану. Думаю, што, знаходзячыся тут, у Беларусі, калі вы захочаце паглядзець якія-небудзь нашы прадпрыемствы, калі ласка, мы арганізуем у любы час наведванне любога прадпрыемства, каб вы маглі пераканацца, што яго прадукцыя прымальная для прымянення ва Узбекістане", - прапанаваў кіраўнік дзяржавы.

Аляксандр Лукашэнка падкрэсліў, што Беларусь заўсёды была дружалюбна і па-брацку настроена да Узбекістана і народа гэтай краіны. "Можаце не сумнявацца, што так будзе заўсёды. Я часта гавару аб тым, што мы вельмі падобныя сваёй працавітасцю, патрыятычнасцю і стаўленнем да сваёй дзяржавы. Таму давайце будзем выконваць дамоўленасці, якіх мы дасягнулі тады ў Ташкенце", - рэзюмаваў Прэзідэнт.
Бахціёр Саідаў у сваю чаргу перадаў Аляксандру Лукашэнку словы прывітання ад яго ўзбекскага калегі. "Ён асобна звярнуў маю ўвагу і сказаў: "Перадай мае найлепшыя пажаданні майму сябру". Вядома, той візіт, які быў зроблены вамі ва Узбекістан, - гэта гістарычны візіт", - заявіў міністр.

Паводле яго слоў, Узбекістан гатовы ўзняць адносіны з Беларуссю на якасна новы ўзровень па ўсіх напрамках.-0-
Падпісвайцеся на нас у
Twitter
Топ-навіны
Свежыя навіны Беларусі