2 жніўня, Мінск /Аліна Грышкевіч - БЕЛТА/. Беларусь і Кітай рыхтуюцца да падпісання дэкларацыі аб павышэнні ўзроўню двухбаковага супрацоўніцтва. Гэта адзначыў Надзвычайны і Паўнамоцны Пасол Рэспублікі Беларусь у Кітайскай Народнай Рэспубліцы Юрый Сянько ў эфіры праграмы "Размова ў Прэзідэнта" на тэлеканале "Беларусь 1", паведамляе БЕЛТА.
"Мы працуем над тым, каб падпісаць у бліжэйшы час дэкларацыю аб павышэнні супрацоўніцтва да ўзроўню жалезнага братэрства, усепагоднага партнёрства, - падкрэсліў дыпламат. - Лічым, што ў бліжэйшы час дакумент можа быць падпісаны".
"На сённяшні дзень мы дасягнулі такога ўзроўню ўзаемаадносін, што неабходна задакументаваць гэту ступень", - прадоўжыў ён. Пасол звярнуў увагу на важнасць таго, што ў практычным плане гэта азначае давер паміж нашымі краінамі.
Павышэнне ўзроўню двухбаковага супрацоўніцтва павінна паўплываць на ўсе напрамкі кантактаў паміж Беларуссю і КНР. Цераз прызму гэтых узаемаадносін будуць выбудоўвацца ўсе сувязі ў розных сферах - эканоміцы, палітыцы, адукацыі, культуры.
"Гэта самы высокі ўзровень узаемаадносін", - заўважыў Юрый Сянько, растлумачыўшы, што гэта будзе садзейнічаць яшчэ больш хуткаму і аператыўнаму вырашэнню ўсіх пытанняў беларуска-кітайскага парадку дня.-0-
