11 студзеня, Масква /Эдуард Півавар - БЕЛТА/. Рашэнне аб вывадзе міратворчага кантынгенту АДКБ з Казахстана будзе прынята пасля афіцыйнага звароту кіраўніцтва краіны. Аб гэтым карэспандэнту БЕЛТА паведаміў прэс-сакратар АДКБ Уладзімір Зайнетдзінаў.
"У Сакратарыяце АДКБ ведаюць аб заяве Прэзідэнта Казахстана Касым-Жамарта Такаева, - адзначыў прэс-сакратар. - Звароту ад казахстанскага боку пакуль не паступала. Як толькі ён паступіць, у Сакратарыяце АДКБ аператыўна падрыхтуюць усе праекты рашэнняў Савета калектыўнай бяспекі. У мэтах выканання рашэння Савета калектыўнай бяспекі Саветам міністраў абароны АДКБ будзе вызначаны парадак вываду Калектыўных міратворчых сіл АДКБ з Казахстана".
Уладзімір Зайнетдзінаў дадаў, што вынікі міратворчай місіі АДКБ будуць падведзены на пазачарговым пасяджэнні Савета міністраў абароны АДКБ.-0-