12 красавіка, Амурская вобласць /Кар. БЕЛТА/. Расійская спецаперацыя ў Данбасе ідзе па плане. Аб гэтым Прэзідэнт Расіі Уладзімір Пуцін заявіў журналістам па выніках перагавораў з кіраўніком беларускай дзяржавы Аляксандрам Лукашэнкам на касмадроме Усходні ў Амурскай вобласці, перадае карэспандэнт БЕЛТА.
Кіраўнік расійскай дзяржавы перш за ўсё падзякаваў ваеннаслужачым за гераізм і мужнасць, з якімі яны абараняюць інтарэсы Расіі.
"Аперацыя ідзе па плане, - сказаў ён. - Дзеянні ў пэўных рэгіёнах Украіны былі звязаны толькі з тым, каб скаваць сілы, разбурыць ваенную інфраструктуру, стварыць умовы правядзення больш актыўных дзеянняў на тэрыторыі Данбаса".
Уладзімір Пуцін падкрэсліў, што Расія магла б павялічыць інтэнсіўнасць баявых дзеянняў, але гэта было б так ці інакш звязана з больш маштабнымі стратамі з абодвух бакоў. "Наша задача - дасягнуць усіх намечаных мэт, мінімізуючы гэтыя страты. І мы будзем дзейнічаць рытмічна, спакойна, у адпаведнасці з планам, які з самага пачатку быў прапанаваны Генеральным штабам", - заявіў Прэзідэнт.-0-
