29 снежня, Мінск /Кар. БЕЛТА/. Прэм'ер-міністр Расіі Дзмітрый Мядзведзеў падпісаў распараджэнне аб стварэнні расійска-беларускай рабочай групы для абмеркавання розных аспектаў інтэграцыі і спрэчных пытанняў, паведамляе ТАСС.
Ад расійскага боку групу ўзначаліў міністр эканамічнага развіцця Максім Арэшкін. Туды таксама ўвайшлі прадстаўнікі розных ведамстваў, Дзяржаўнай думы, Савета Федэрацыі і Падліковай палаты.
Як паведамляў 25 снежня пасля сустрэчы кіраўнікоў дзяржаў Расіі і Беларусі першы віцэ-прэм'ер, міністр фінансаў Расіі Антон Сілуанаў, Беларусь і Расія створаць міжурадавую рабочую групу па выпрацоўцы прапаноў па інтэграцыі і вырашэнні пытанняў беларуска-расійскага парадку дня. "Гэта рабочая група будзе рыхтаваць прапановы па нашай далейшай інтэграцыі і вырашэнні тых надзённых пытанняў, якія хвалююць урады нашых краін", - сказаў Антон Сілуанаў.
Адказваючы на ўдакладняючае пытанне, ён заявіў, што ў частцы цэнаўтварэння на газ бакі павінны вызначыцца за наступны перыяд, пачынаючы з 2020 года, выпрацаваць прапановы па фарміраванні цэн на гэты від энерганосьбітаў. "Што датычыцца рабочай групы, то яна будзе выпрацоўваць прапановы як па далейшай інтэграцыі, так і вырашэнні пытанняў, якія знаходзяцца на парадку дня паміж Расіяй і Беларуссю", - удакладніў Антон Сілуанаў.-0-
