15 снежня, Мінск /Кар. БЕЛТА/. Прынятыя ЕС санкцыйныя дакументы супярэчаць Статуту ААН, заявіў старшыня Канстытуцыйнага суда Пётр Міклашэвіч, агучваючы рашэнне Канстытуцыйнага суда па справе "Аб адпаведнасці агульнапрызнаным прынцыпам і нормам міжнароднага права дакументаў, прынятых (выдадзеных) Еўрапейскім саюзам і некаторымі замежнымі дзяржавамі і іх органамі, якія прадугледжваюць увядзенне абмежавальных мер у адносінах да Рэспублікі Беларусь", перадае карэспандэнт БЕЛТА.
"Канстытуцыйны суд адзначае, што дакументы Еўрапейскага саюза і некаторых замежных дзяржаў, якія прадугледжваюць увядзенне абмежавальных мер у адносінах да Рэспублікі Беларусь, супярэчаць палажэнням глаў 6 і 7 Статута ААН, якімі ўстаноўлены механізм прымянення прэвентыўных і прымусовых мер супраць дзяржавы толькі па рашэнні Савета Бяспекі ААН у мэтах падтрымання міжнароднага міру і бяспекі", - сказаў Пётр Міклашэвіч.
Старшыня КС нагадаў, што абавязацельствы дзяржаў па выкананні прынцыпу неўмяшання ў справы, якія ўваходзяць ва ўнутраную кампетэнцыю любой дзяржавы і прынцыпы суверэннай роўнасці дзяржаў замацаваны ў Дэкларацыі аб недапушчальнасці ўмяшання ва ўнутраныя справы дзяржаў, аб ахове іх незалежнасці і суверэнітэту 1965 года, Дэкларацыі аб прынцыпах міжнароднага права 1970 года, Хартыі эканамічных правоў і абавязкаў дзяржаў 1974 года.-0-
