28 лістапада, Масква /Эдуард Півавар - БЕЛТА/. Нарада кіраўнікоў (начальнікаў штабоў) нацыянальных антытэрарыстычных цэнтраў дзяржаў - удзельніц СНД на тэму "Контртэрарыстычнае супрацоўніцтва дзяржаў Садружнасці ва ўмовах зменлівай міжнароднай абстаноўкі" пройдзе 2 сакавіка ў Маскве. Аб гэтым БЕЛТА паведамілі ў прэс-бюро Антытэрарыстычнага цэнтра (АТЦ) дзяржаў - удзельніц СНД.
"Запланаваны абмен думкамі па актуальных праблемах процідзеяння тэрарызму і экстрэмізму", - адзначылі ў прэс-бюро.
Чакаецца, што ўдзельнікамі нарады стануць прадстаўнікі органаў бяспекі і спецыяльных службаў дзевяці дзяржаў СНД - Беларусі, Азербайджана, Арменіі, Казахстана, Кыргызстана, Малдовы, Расіі, Таджыкістана і Узбекістана, а таксама органаў СНД: Выканаўчага камітэта, Каардынацыйнай службы Савета камандуючых пагранічнымі войскамі, сакратарыята Савета міністраў абароны, Каардынацыйнага савета генеральных пракурораў, Савета кіраўнікоў падраздзяленняў фінансавай разведкі, Бюро па каардынацыі барацьбы з арганізаванай злачыннасцю і іншымі небяспечнымі відамі злачынстваў на тэрыторыі дзяржаў - удзельніц СНД. На мерапрыемства запрошаны таксама прадстаўнікі трох міжнародных арганізацый: Сакратарыята Арганізацыі Дагавора аб калектыўнай бяспецы, Сакратарыята Еўразійскай групы па процідзеянні легалізацыі злачынных даходаў і фінансаванню тэрарызму, Выканаўчага камітэта рэгіянальнай антытэрарыстычнай структуры Шанхайскай арганізацыі супрацоўніцтва.
"У рамках мерапрыемства ў завочным фармаце пройдзе пашыранае пленарнае пасяджэнне Навукова-кансультатыўнага савета пры АТЦ СНД па пытаннях забеспячэння бяспекі ў перыяд правядзення важных грамадска-палітычных мерапрыемстваў на прасторы СНД", - дадалі ў прэс-бюро.-0-
