11 красавіка, Мінск /Кар. БЕЛТА/. Кантактная група па Украіне сышлася на думцы аб неабходнасці аб'яўлення велікоднага перамір'я. Аб гэтым 10 красавіка паведаміў журналістам спецпрадстаўнік АБСЕ ў трохбаковай кантактнай групе па сітуацыі на ўсходзе Украіны Марцін Сайдзік, перадае карэспандэнт БЕЛТА.
Абмеркаванне агульнай сітуацыі з бяспекай і падрыхтоўка да аб'яўлення перамір'я з нагоды велікодных свят склалі аснову на пасяджэнні рабочай групы па бяспецы. "У выніку ТКГ сышлася на думцы аб неабходнасці аб'яўлення перамір'я і дамовілася правесці дадатковую відэаканферэнцыю 18 красавіка для яго канчатковага ўзгаднення. Вопыт паказвае, што для эфектыўнага і доўгатэрміновага перамір'я самае галоўнае - гэта палітычная воля бакоў, пры яе наяўнасці гэта зрабіць нескладана", - адзначыў Марцін Сайдзік.
Падгрупа таксама абмеркавала дадатковыя меры па забеспячэнні бяспекі і гуманітарнага размініравання. Удзельнікі ж эканамічнай рабочай групы выказалі заклапочанасць сітуацыяй, якая ўзнікла ў пачатку месяца вакол кампаніі "Вада Данбаса" ў сувязі з перабоямі электразабеспячэння. Марцін Сайдзік заклікаў бакі канфлікту забяспечыць бяспеку і ўстойлівае функцыянаванне як кампаніі "Вада Данбаса", так і ўсіх іншых жыццёва важных аб'ектаў грамадзянскай інфраструктуры.
Дыпламат таксама паведаміў, што каардынатар гуманітарнай рабочай групы пасол Тоні Фрыш прадставіў рэзультаты свайго візіту на ўсход Украіны, які быў зроблены 3-9 красавіка. У час паездкі ў месцы ўтрымання па абодва бакі ад лініі сутыкнення ён сустракаўся з утрымліваемымі асобамі, іх роднымі і блізкімі, а таксама са сваякамі прапаўшых без вестак. Адказваючы на пытанне аб складанасцях сустрэчы з утрымліваемымі ў сувязі з канфліктам, Марцін Сайдзік адзначыў, што Тоні Фрыш па гэтым пытанні быў толькі на ўкраінскім баку. "Ён наведаў утрымліваемых у турме ў Марыупалі. Хацелася б у сувязі з гэтым нагадаць, што згодна з міжнародным гуманітарным правам Міжнародны камітэт Чырвонага Крыжа павінен мець доступ да ўтрымліваемых па абодва бакі ад лініі сутыкнення. МКЧК пакуль мае такі доступ толькі на тэрыторыі, падкантрольнай ураду Украіны", - сказаў дыпламат.
На пытанне аб тым, ці абмяркоўваліся ў ТКГ выбары прэзідэнта Украіны, Марцін Сайдзік адказаў адмоўна. Ён таксама абверг інфармацыю аб тым, што адбылася дыскусія толькі ў падгрупе па бяспецы.
Наступнае пасяджэнне кантактнай групы пройдзе ў Мінску 24 красавіка.-0-