5 снежня, Мінск /Аліна Грышкевіч - БЕЛТА/. Намеснік міністра замежных спраў Рэспублікі Беларусь Алег Краўчанка сёння сустрэўся з упаўнаважаным па краінах Усходняй Еўропы, Каўказа і Цэнтральнай Азіі МЗС ФРГ Міхаэлем Зібертам, які знаходзіцца ў нашай краіне з мэтай удзелу ў XVII Мінскім форуме. Аб гэтым карэспандэнту БЕЛТА паведамілі ў прэс-службе МЗС.
На сустрэчы былі разгледжаны стан і перспектывы развіцця беларуска-германскага ўзаемадзеяння і дыялогу па лініі Беларусь - ЕС. Адбыўся таксама абмен думкамі па актуальных пытаннях міжнароднага парадку дня.
Асаблівая ўвага ўдзелена стварэнню беларуска-германскай кансультацыйнай групы для абмеркавання стратэгіі развіцця двухбаковых адносін. Адпаведная дамоўленасць была дасягнута міністрамі замежных спраў Беларусі і Германіі на перагаворах у кастрычніку 2019 года ў Берліне.-0-
