Мабільная версія
ДЗЯРЖОРГАНЫ

Апошнія навіны
Усе навіны
Ірына Касцевіч

Трэба цаніць кожнае імгненне сустрэч з ветэранамі

Меркаванні 01.07.2019 | 16:12
Ірына Касцевіч Ірына Касцевіч Міністр працы і сацыяльнай абароны

Мінск /Кар. БЕЛТА/. Сустрэчы з ветэранамі Вялікай Айчыннай вайны асабліва важныя цяпер, калі колькасць тых, хто застаецца ў страі, імкліва скарачаецца. Такое меркаванне выказала карэспандэнту БЕЛТА міністр працы і сацыяльнай абароны Ірына Касцевіч на святочным мерапрыемстве ў Палацы ветэранаў.

Літаральна праз некалькі дзён будзе адзначацца 75-годдзе вызвалення ад нямецка-фашысцкіх захопнікаў. Але, на жаль, усё менш застаецца жывых сведак падзей той эпохі, якія разам з усім народам сустракаюць гэту знакавую дату. "За апошнія чатыры гады з жыцця пайшлі амаль 11 тыс. ветэранаў Вялікай Айчыннай вайны, іх колькасць скарацілася ў два з палавінай разы", - адзначыла Ірына Касцевіч. Самым маладым удзельнікам і інвалідам вайны сёння 92 гады, самым маладым партызанам і падпольшчыкам - 87 гадоў. "Таму так важна, што і наша пакаленне, і дзеці сустракаюцца з ветэранамі. Гэта наша гісторыя. Ветэраны для нас - узор мужнасці, адвагі, высакароднасці, гонару і любові да Радзімы. Калі мы гэтыя каштоўнасці будзем пераносіць з пакалення ў пакаленне, над нашай зямлёй заўсёды будзе мірнае неба", - упэўнена міністр.

Па стане на 1 чэрвеня ў рэспубліцы пражываюць 6039 ветэранаў Вялікай Айчыннай вайны, уключаючы двух герояў Савецкага Саюза - Кустава Івана Ільіча (96-ы год) і Мічурына Васіля Сяргеевіча (103 гады), і яшчэ крыху больш за 15 тыс. грамадзян, якія пацярпелі ад наступстваў вайны, з іх больш як 14 тыс. - былыя вязні фашызму.

"Вядома, клопат аб ветэранах, людзях, якія падарылі свету жыццё і свабоду, іх сацыяльная падтрымка - наш прыярытэт. Першае - гэта аднаразовая матэрыяльная дапамога ветэранам і грамадзянам, якія пацярпелі ад наступстваў вайны. Яе атрымалі больш за 22 тыс. чалавек", - расказала Ірына Касцевіч. Сума выплат вар'іруецца ад Br650 да Br1500, а для Герояў Савецкага Саюза - Br2 тыс. Усяго на гэтыя мэты ў рэспубліканскім бюджэце прадугледжана Br18 млн.

Да 1 красавіка былі вывучаны матэрыяльна-бытавыя ўмовы ветэранаў і пацярпелых ад наступстваў войнаў (усяго амаль 23 тыс. чалавек), каб зрабіць усё магчымае для паляпшэння іх жыцця, вырашыць існуючыя праблемы. На гэтыя мэты (рамонт даху, саміх памяшканняў, печаў, столей, нарыхтоўка дроў, абкошванне травы і інш.) накіравана Br168 тыс.

Ірына Касцевіч падкрэсліла, што дзяржаўная комплексная падтрымка - гэта таксама надбаўкі і павышэнні да пенсій. З улікам устаноўленых павышэнняў і даплат памер пенсіі ветэранаў вайны складзе ў чэрвені прыкладна ад Br530 да Br760. "Важна, што для ветэранаў сёння бясплатна прадастаўляюцца лякарствы, сродкі пратэзавання і тэхнічныя сродкі рэабілітацыі, магчымасць санаторна-курортнага аздараўлення, прычым калі чалавек не скарыстаўся ёю, яму выплачваецца кампенсацыя ў памеры 10 базавых велічынь (1 БВ - Br25,5). Гэта і льготы пры аплаце паслуг ЖКГ, бясплатны праезд у грамадскім транспарце. Тэрытарыяльныя цэнтры сацыяльнага абслугоўвання прапануюць свае паслугі, у асноўным запатрабавана абслугоўванне сацыяльнымі работнікамі дома", - расказала міністр.

Ірына Касцевіч сёння ў цёплай нефармальнай атмасферы пагутарыла з дзесяццю ветэранамі Вялікай Айчыннай вайны - членамі Беларускага грамадскага аб'яднання ветэранаў. Гэта Валянціна Чудаева, Дзмітрый Марчанка, Віктар Кастко, Лідзія Сушкевіч, Леў Шэйнкман, Піліп Карлаў, Браніслаў Карпенка, Лідзія Волкава, Арсеній Люцко, Тамара Заўгародняя. Гучалі віншаванні і песні ваенных гадоў, успаміны ветэранаў. З нагоды свята яны атрымалі ад Мінпрацы і Рэспубліканскага савета Беларускага грамадскага аб'яднання ветэранаў памятныя падарункі. Далучыліся да віншаванняў прадстаўнікі камітэта па працы, занятасці і сацыяльнай абароне Мінгарвыканкама і іншыя госці. Ірына Касцевіч выказала ўдзячнасць кожнаму за падоранае цэлым пакаленням беларусаў шчасце жыць у свабоднай краіне, а таксама за бадзёрасць духу, гатоўнасць удзельнічаць у мерапрыемствах, дзяліцца ўспамінамі. Міністр пажадала сабраць сілу волі і ўсё здароўе, каб і ў наступным годзе сустрэць разам 75-годдзе Вялікай Перамогі.

Святочныя мерапрыемствы напярэдадні Дня Незалежнасці праходзяць па ўсёй Беларусі. Напрыклад, у канцы мінулага тыдня кіраўніцтва Міністэрства працы і сацыяльнай абароны наведала Рэспубліканскі інтэрнат ветэранаў вайны і працы інтэрната, дзе пражываюць 114 пажылых грамадзян. Усе яны - заслужаныя людзі, якія ўнеслі важкі ўклад у абарону Радзімы ў гады Вялікай Айчыннай вайны і развіццё народнай гаспадаркі краіны ў мірны час. У тым ліку 42 ветэраны Вялікай Айчыннай вайны - удзельнікі, інваліды, працаўнікі тылу, а таксама некалькі былых вязняў. У інтэрната было адразу дзве нагоды для ўрачыстасцей - 75 гадоў вызвалення Беларусі ад нямецка-фашысцкіх захопнікаў і 45-годдзе самой ўстановы, якое адбудзецца 3 ліпеня. "А заўтра групай актыўных ветэранаў мы вырашылі ўскласці кветкі да манумента Перамогі, далучыўшыся да акцыі "Беларусь памятае. Памятаем кожнага". Важна, што ініцыятыва ідзе ад моладзі. Як і такія сустрэчы, на якіх юнаму пакаленню перадаюцца важныя каштоўнасці. Да таго ж ветэранам патрэбны ўвага, сустрэчы, ласкавае слова", - дадала Ірына Касцевіч.

Акцыя "Беларусь памятае. Памятаем кожнага" стартавала 30 чэрвеня па ініцыятыве Беларускай рэспубліканскай піянерскай арганізацыі ў Нацыянальным дзіцячым адукацыйна-аздараўленчым цэнтры "Зубраня". Юныя беларусы ўсклалі кветкі да абеліска ў Мядзеле, падзяліліся сваімі сямейнымі гісторыямі, якія звязвае агульная Перамога, і ўшанавалі памяць воінаў-вызваліцеляў мінутай маўчання. Урачыстыя цырымоніі ўскладання кветак да абеліскаў у перадсвяточныя дні пройдуць па ўсёй краіне. Да акцыі можа далучыцца любы беларус.

Версія для друку
Топ-навіны
Надвор'e
Мінск
Баранавічы
Бабруйск
Барысаў
Брэст
Варшава
Вільнюс
Віцебск
Гомель
Гродна
Жлобін
Кіеў
Ліда
Мінск
Магілёў
Магілёў
Мозыр
Масква
Орша
Полацк
Рыга
Санкт-Пецярбург
Салігорск
Салігорск

Інфаграфіка

Рэкамендацыі для тых, хто плануе паездкі ў Ізраіль Пры ўзнікненні спрэчных сітуацый на граніцы прасіць супрацоўнікаў міграцыйнай службы звязацца з запрашаючымі асобамі для пацвярджэння імі гатоўнасці прыняць вас ва ўзгодненыя тэрміны.