Дзякуючы нацыянальным СМІ ўмацоўваецца імідж Беларусі ў свеце. Такое меркаванне 10 лютага на пасяджэнні падагульняючай калегіі Міністэрства інфармацыі выказаў намеснік прэм'ер-міністра Ігар Петрышэнка, перадае карэспандэнт БЕЛТА.
"Нацыянальны рынак масмедыя развіваецца ў адпаведнасці з сучаснымі рэаліямі, адкрытая і паслядоўная пазіцыя Беларусі чуваць у свеце, - сказаў Ігар Петрышэнка. - Істотна ўмацаваны пазітыўны імідж краіны на міжнароднай арэне. Гэтаму садзейнічалі і поспехі Міністэрства інфармацыі ў арганізацыі і асвятленні розных значных мерапрыемстваў рэспубліканскага і міжнароднага ўзроўню".
Віцэ-прэм'ер абазначыў задачы, якія стаяць сёння перад дзяржаўнымі сродкамі масавай інфармацыі. У прыватнасці, для асноўных тэлеканалаў ён вызначыў тры задачы. Першая - да канца года яны павінны забяспечыць у штомесячным аб'ёме вяшчання праграм аб'ём нацыянальнага кантэнту не меншы за 30 працэнтаў. Прычым гэта павінны быць цікавыя, змястоўныя, аўтарскія праграмы, як сур'ёзныя аналітычныя, так і забаўляльныя.
Цяперашнія тэлегледачы - у большасці сваёй людзі сярэдняга і сталага ўзросту. Моладзь значную долю тэлевізійных праектаў глядзіць па інтэрнэт-каналах. "Адсюль вынікае і адна са стратэгічных задач - пашыраць кантэнт праз інтэрнэт. Думаю, яна тэлеканалам пад сілу. Трэцяе - у сувязі з неэфектыўнай сістэмай узаемадзеяння рэкламадаўцаў і тэлеканалаў, істотна знізіліся даходы тэлеканалаў, як вынік - іх фінансава-эканамічныя паказчыкі ў цэлым. Адной з задач Міністэрства інфармацыі на бягучы год лічу неабходным стварэнне дзейснай сістэмы медыявымярэнняў. Трэба ведаць сваю аўдыторыю, яе запатрабаванні, а потым ужо будаваць тактычныя планы і выпрацоўваць стратэгіі", - адзначыў Ігар Петрышэнка.
У бліжэйшы час таксама неабходна завяршыць стварэнне Асацыяцыі радыёвяшчальнікаў, паскорыць работу па развіцці нацыянальнай сферы радыёвяшчання. Што датычыцца друкаваных СМІ, то ім трэба больш пільную ўвагу звярнуць на напаўненне. "Журналіст павінен умець убачыць цікавы факт або з'яву і расказаць пра гэта ярка і займальна. А калі гэта аналітычны артыкул, то ён павінен у першую чаргу быць напісаны дасведчана і зразумелай мовай, - заявіў віцэ-прэм'ер. - Калі мы не раскажам аб праблеме, то пра яе на ўзроўні краіны раскажуць на папулярным інтэрнэт-сайце, на ўзроўні рэгіёна - блогеры. Таму нам неабходна перахапіць ініцыятыву, у тым ліку і ў інтэрнэце".
Сёння, калі імкліва развіваюцца сацыяльныя медыя, традыцыйным СМІ неабходна прыкладаць максімум намаганняў не толькі для таго, каб утрымаць сваю аўдыторыю, але і яе пашыраць. "У гэтай рабоце нельга абмяжоўвацца толькі сайтамі. Выданні, у першую чаргу рэгіянальныя, павінны працаваць у сацсетках, ствараць свае супольнасці", - дадаў Ігар Петрышэнка.
