4 студзеня, Мінск /Кар. БЕЛТА/. Міжнародныя рэзервовыя актывы Беларусі на 1 студзеня 2019 года, паводле папярэдніх даных, склалі $7 млрд 157,6 млн (у эквіваленце), паведамілі БЕЛТА ва ўпраўленні інфармацыі і грамадскіх сувязей Нацыянальнага банка.
За снежань 2018 года золатавалютныя рэзервы знізіліся на $282,3 млн (на 3,8 працэнта) пасля росту ў лістападзе 2018 года на $332,3 млн (на 4,7 працэнта).
У снежні 2018 года ўрадам і Нацыянальным банкам выканана знешніх і ўнутраных абавязацельстваў у замежнай валюце на суму каля $940 млн, у тым ліку датэрмінова - $470 млн.
Падтрыманню ўзроўню золатавалютных рэзерваў у снежні садзейнічалі паступленне замежнай валюты ў бюджэт, у тым ліку ад спагнання экспартных пошлін на нафту і нафтапрадукты, паступленне сродкаў ад продажу Нацыянальным банкам і Міністэрствам фінансаў аблігацый, намініраваных у замежнай валюце, купля замежнай валюты Нацбанкам на таргах Беларускай валютна-фондавай біржы. Станоўчы ўплыў на ўзровень рэзерваў таксама аказала павелічэнне кошту манетарнага золата.
Згодна з Асноўнымі напрамкамі грашова-крэдытнай палітыкі на 2018 год аб'ём міжнародных рэзервовых актываў на 1 студзеня 2019 года з улікам пагашэння ўрадам і Нацбанкам унутраных і знешніх абавязацельстваў у замежнай валюце павінен быў скласці не менш як $6 млрд. У цэлым па выніках 2018 года зніжэнне рэзерваў склала $157,7 млн (2,2 працэнта). Пры гэтым урадам і Нацбанкам за 2018 год выканана абавязацельстваў у замежнай валюце на суму каля $5,7 млрд.
Золатавалютныя рэзервы ў 2018 годзе папаўняліся ў асноўным за кошт недаўгавых крыніц: паступлення ў бюджэт падаткаў, пошлін і іншых плацяжоў у замежнай валюце, а таксама куплі замежнай валюты на ўнутраным валютным рынку. Станоўчы ўплыў на ўзровень ЗВР таксама аказалі выпуск Нацбанкам і Мінфінам валютных аблігацый на ўнутраным рынку і паступленне сродкаў ад размяшчэння еўрааблігацый на знешніх фінансавых рынках.
У адпаведнасці з Асноўнымі напрамкамі грашова-крэдытнай палітыкі на 2019 год аб'ём міжнародных рэзервовых актываў на 1 студзеня 2020 года павінен скласці не менш як $7,1 млрд.-0-
