24 кастрычніка, Мінск /Кар. БЕЛТА/. Змяненні ў прадастаўленні і прыцягненні пазык прызначаны павысіць даступнасць фінансавання для насельніцтва, накіраваны на абарону правоў спажыўцоў паслуг мікрафінансавых арганізацый, паведамілі БЕЛТА ва ўпраўленні інфармацыі і грамадскіх сувязей Нацыянальнага банка, каменціруючы падпісаны 23 кастрычніка ўказ нумар 394.
Дакумент адмяняе дзеянне ўказа ад 30 чэрвеня 2014 года нумар 325. Асноўныя яго палажэнні ўступаюць у сілу праз шэсць месяцаў пасля афіцыйнага апублікавання. Гэты час даецца Нацыянальнаму банку і Савету Міністраў, каб прывесці нарматыўныя прававыя акты ў адпаведнасць.
Ва ўпраўленні інфармацыі і грамадскіх сувязей адзначылі, што навацыі прадугледжваюць далейшае зніжэнне даўгавой нагрузкі на грамадзян праз абмежаванні сумы працэнтаў і няўстойкі, якія налічаюцца па дагаворах мікрапазыкі. Максімальны памер працэнтаў за ўвесь перыяд карыстання грашовымі сродкамі не можа перасягаць двухкратны памер асноўнага доўгу, а няўстойка (штраф, пеня) за парушэнне ўмоў - палавіну памеру асноўнага доўгу.
"Абмежаванне датычыцца ўсіх дагавораў мікрапазыкі, у тым ліку заключаных да моманту ўступлення ў сілу ўказа нумар 394", - растлумачылі ў Нацбанку.
Каб выключыць асобныя нядобрасумленныя практыкі, абмяжоўваецца спектр рэчаў, якія выступаюць прадметам лізінгу па дагаворах зваротнага лізінгу, што заключаюцца з фізічнымі асобамі. Імі змогуць стаць толькі транспартныя сродкі і жылыя памяшканні. Аналіз паказаў, што пад выглядам дагавораў зваротнага лізінгу тэлефонаў, смартфонаў і іншай бытавой тэхнікі фактычна прадастаўляліся грошы ў пазыку пад завышаныя працэнтныя стаўкі без належнага інфармавання спажыўцоў.
Таксама ўстанаўліваюцца патрабаванні да рэкламы пазык і мікрапазык. У аснове - поўная і дакладная інфармацыя аб рэкламадаўцах і рэкламуемай імі дзейнасці. Правілы распаўсюджваюцца як на мікрафінансавыя арганізацыі, так і на фізічных і іншых юрыдычных асоб, якія прадастаўляюць грашовыя сродкі ў пазыку. Сярод іншага павінны адлюстроўвацца звесткі аб нарматыўным прававым акце, у адпаведнасці з якім прадастаўляюцца пазыкі.
"Пры гэтым цывілізаваныя спосабы мікрафінансавання атрымаюць далейшае развіццё. У прыватнасці, спросціцца работа ламбардаў, якія выдаюць кароткатэрміновыя пазыкі пад залог аўтамабіляў. Прадастаўляць мікрапазыкі пад залог рухомай маёмасці змогуць дзяржаўныя юрыдычныя асобы, якія аказваюць бытавыя паслугі насельніцтву і зарэгістраваныя ў сельскай мясцовасці, а таксама юрыдычныя асобы, якія ажыццяўляюць скупку каштоўных металаў і камянёў для папаўнення дзяржфонду", - расказалі ва ўпраўленні інфармацыі і грамадскіх сувязей.
Акрамя таго, членамі спажывецкіх кааператываў фінансавай узаемадапамогі (для атрымання фінансавання сваёй дзейнасці) змогуць стаць фізічныя асобы, якія ажыццяўляюць вытворчасць сельскагаспадарчай прадукцыі і (або) віды дзейнасці, пры якіх выплачваецца адзіны падатак. З відаў некамерцыйных мікрафінансавых арганізацый выключаюцца арганізацыі, створаныя ў арганізацыйна-прававой форме фонду. Пры гэтым суб'екты малога і сярэдняга прадпрымальніцтва, у тым ліку індывідуальныя прадпрымальнікі, якія раней былі пазычальнікамі, змогуць быць членамі спажывецкіх кааператываў фінансавай узаемадапамогі.
У канфліктнай сітуацыі паміж пазычальнікам і пазыкадаўцам да звяртання ў суд або Нацыянальны банк абавязковым будзе прад'яўленне бакамі спрэчкі прэтэнзіі - пісьмовай прапановы аб добраахвотным урэгуляванні спрэчкі, якая ўзнікла. Патрабаванне аб фарміраванні мінімальнага памеру статутнага фонду ламбардаў грашовымі сродкамі дасць магчымасць палепшыць фінансавае становішча ламбардаў і ўзровень адказнасці іх заснавальнікаў.
"Такім чынам, указ нумар 394 і прынятыя ў мэтах яго выканання дакументы будуць садзейнічаць павышэнню даступнасці фінансавання для насельніцтва, паляпшэнню абароны правоў спажыўцоў паслуг мікрафінансавых арганізацый, а таксама фінансавага становішча і парадку функцыянавання саміх арганізацый", - адзначылі ў Нацбанку.-0-
