22 чэрвеня, Віцебск /Кар. БЕЛТА/. Віцебскае ААТ "Завод "ВІЗАС" ліквідуецца па рашэнні пазачарговага сходу акцыянераў, паведаміў карэспандэнту БЕЛТА ліквідатар юрыдычнай асобы Міхаіл Іўчанка.
Працэдура павінна быць праведзена за дзевяць месяцаў з моманту прыняцця рашэння, гэта значыць да 10 сакавіка 2022 года, растлумачыў Міхаіл Іўчанка. Прадпрыемства доўгі час працуе са стратамі, неплацежаздольнасць устойлівая, выручка не дазваляе своечасова выконваць абавязацельствы. З 2019 года завод знаходзіўся ў рэжыме дасудовага аздараўлення, аднак мерапрыемствы аказаліся эканамічна неэфектыўнымі.
Паводле даных Міністэрства прамысловасці, якое выступае органам ўладальніцкага нагляду, на працягу 2020 года прадпрыемству неаднаразова дапамагалі ў выплаце зарплаты шляхам прадастаўлення пазык, заключэннем дагавораў з падведамнымі арганізацыямі. Немалаважным фактарам пры прыняцці рашэння аб ліквідацыі стала тое, што прадпрыемства нямэтавым чынам расходавала авансы, атрыманыя па дагаворах на вытворчасць абсталявання. У выніку пад пагрозай зрыву аказаўся партфель заказаў на суму каля Br5 млн, паколькі выкарыстаны для яго выканання аб'ём інвестыцый перасягае мяркуемую выручку.
У канцы 2020 года работа кіраўніцтва завода па стабілізацыі фінансавага становішча прызнана нездавальняючай і неэфектыўнай, пасля чаго на падставе рашэння камісіі па папярэджанні эканамічнай неплацежаздольнасці (банкруцтва) арганізацый сістэмы Мінпрама ўзгоднена падача ў эканамічны суд заявы аб банкруцтве. На 1 кастрычніка 2020 года крэдыторская запазычанасць склала каля Br10,9 млн, у тым ліку звыш Br2 млн па абавязковых плацяжах у бюджэт. Кошт маёмасці ацэньваўся амаль у Br17,6 млн.
Суд прыйшоў да высновы, што даўжнiк не змог абгрунтаваць немагчымасць задаволіць патрабаванні крэдытораў поўнасцю, не прадставіў дакументы, якія пацвярджаюць яго няздольнасць разлічыцца па даўгах. Гэта падстава для вяртання заявы ў адпаведнасці з арт.38 закона "Аб эканамічнай неплацежаздольнасці (банкруцтве)". Праз чатыры месяцы пасля вынясення пастановы суда пазачарговы сход акцыянераў прыняў рашэнне аб ліквідацыі завода "ВІЗАС".
Паводле слоў Міхаіла Іўчанкі, у спісе работнікаў прадпрыемства 173 чалавекі, усе яны пісьмова папярэджаны аб маючым адбыцца звальненні. Паралельна пры падтрымцы гарадской службы занятасці прапрацоўваюцца варыянты іх працаўладкавання. Частку спецыялістаў плануецца перавесці на станкабудаўнічае ААТ "ВІСТАН", адміністрацыя якога пацвердзіла гатоўнасць прыняць на работу больш за 90 чалавек. Такая магчымасць можа быць рэалізавана адначасова з перадачай "ВІСТАНу" канструктарскай дакументацыі на выкананне станкоў "ВІЗАСа", аднак гэтыя дакументы з'яўляюцца інтэлектуальнай уласнасцю даўжнiка, распараджацца якой маюць права толькі крэдыторы.
Першы сход крэдытораў плануецца правесці арыенціровачна ў другой дэкадзе жніўня 2021 года. Цяпер ліквідатар пачаў фарміраванне рэестра патрабаванняў. Маёмасць завода сканцэнтравана на адной вытворчай пляцоўцы ў Віцебску і, паводле даных бухгалтарскага ўліку, яго кошт дазволіць разлічыцца па абавязацельствах даўжнiка. Акрамя таго, завод прадаўжае выконваць ужо аплачаныя заказы. Па рашэнні сходу акцыянераў вытворчую дзейнасць неабходна завяршыць да заканчэння працэдуры ліквідацыі, таму частка сродкаў заказчыкаў будзе ўключана ў рэестр патрабаванняў крэдытораў, растлумачыў Міхаіл Іўчанка.
Віцебскі завод заточных станкоў (ААТ "Завод "ВІЗАС") заснаваны ў 1897 годзе. З 1960 года прадпрыемства спецыялізуецца на выпуску заточнага абсталявання і з'яўляецца адзіным на постсавецкай прасторы вытворцам універсальна-заточных станкоў і заточных станкоў з лічбавым праграмным кіраваннем для вырабу і заточвання любога рэжучага інструмента.-0-
