17 чэрвеня, Мінск /Кар. БЕЛТА/. Віцэ-прэм'еры будуць адказваць за выкананне даручэнняў кіраўніка дзяржавы аб паскораным развіцці 11 гарадоў з колькасцю насельніцтва 80 тыс. чалавек і больш. Гэта прадугледжана распараджэннем прэм'ер-міністра нумар 230р ад 14 чэрвеня 2019 года, паведамілі БЕЛТА ў прэс-службе беларускага ўрада.
Дакумент прыняты ў мэтах забеспячэння эфектыўнага ўзаемадзеяння рэспубліканскіх і мясцовых органаў дзяржкіравання пры выкананні адпаведных даручэнняў.
У адпаведнасці з распараджэннем, першы намеснік прэм'ер-міністра Аляксандр Турчын замацаваны за Мазырскім раёнам Гомельскай вобласці і Лідскім раёнам Гродзенскай вобласці, віцэ-прэм'ер Уладзімір Дворнік - за Бабруйскам і Бабруйскім раёнам Магілёўскай вобласці, віцэ-прэм'ер Уладзімір Кухараў - за Барысаўскім, Маладзечанскім і Салігорскім раёнамі Мінскай вобласці. Віцэ-прэм'ер Ігар Ляшэнка будзе адказваць за Наваполацк, Аршанскі і Полацкі раёны Віцебскай вобласці, віцэ-прэм'ер Ігар Петрышэнка - за Пінск і Пінскі раён, Баранавічы і Баранавіцкі раён Брэсцкай вобласці.
Віцэ-прэм'еры будуць аказваць неабходнае садзейнічанне аблвыканкамам у выпрацоўцы эфектыўных мер, накіраваных на забеспячэнне паскоранага развіцця гарадоў і адпаведных адміністрацыйна-тэрытарыяльных адзінак, а таксама ў стварэнні дадатковых умоў для іх устойлівага эканамічнага росту. Яны таксама будуць садзейнічаць вырашэнню арганізацыйных і тэхнічных пытанняў, звязаных з падрыхтоўкай і рэалізацыяй планаў развіцця названых тэрыторый, у частцы кантролю за ходам ажыццяўлення такіх планаў, а таксама ў ацэнцы чаканых вынікаў ад іх рэалізацыі.
Акрамя таго, адказныя службовыя асобы будуць прымаць меры па ўрэгуляванні спрэчных пытанняў, якія ўзнікаюць пры рэалізацыі планаў развіцця названых тэрыторый.
Пры неабходнасці да гэтай работы ва ўстаноўленым парадку могуць прыцягвацца прадстаўнікі рэспубліканскіх органаў дзяржкіравання і іншых дзяржарганізацый, падпарадкаваных ураду.-0-
