17 чэрвеня, Мінск /Кар. БЕЛТА/. Урад чакае прыняцця ўказа аб 5-працэнтнай рэнтабельнасці забудоўшчыкаў у бліжэйшы час, паведаміў журналістам намеснік прэм'ер-міністра Уладзімір Кухараў сёння ў час наведвання КУП "Завод эфектыўных прамысловых канструкцый", перадае карэспандэнт БЕЛТА.
"Праект нарматыўнага прававога акта ўжо з усімі ўзгоднены і накіраваны на падпісанне. Чакаем, што ў бліжэйшы час ён будзе прыняты. Мы сёння вельмі сур'ёзную ўвагу ўдзяляем менавіта патанненню будаўніцтва, павышэнню эфектыўнасці, зніжэнню затрат на выпуск канструкцый", - адзначыў Уладзімір Кухараў.
На Заводзе эфектыўных прамысловых канструкцый цяпер ідзе мадэрнізацыя, якую плануюць завяршыць да канца года. "Будзе ўстаноўлена сучаснае абсталяванне, якое дасць магчымасць удасканаліць работу, павысіць эфектыўнасць тэхналагічных ліній, знізіць затраты. Гэта, зразумела, паўплывае на кошт жылля, - растлумачыў віцэ-прэм'ер. - Разлікі паказваюць, што гэта будзе энергаэфектыўнае жыллё, якое адпавядае ўсім неабходным спажывецкім патрабаванням".
Акрамя таго, вядуцца работы, каб на новым абсталяванні можна было выпускаць канструкцыі для будаўніцтва не толькі жылля, але і школ, дзіцячых садоў, бальніц. Гэта дапаможа скараціць тэрміны ўзвядзення гэтых сацыяльных аб'ектаў і знізіць кошт.
Што датычыцца перспектыў экспарту новай прадукцыі, то, паводле слоў Уладзіміра Кухарава, у першую чаргу ставіцца задача забяспечыць якасным жыллём жыхароў Беларусі. "Тым не менш, думаю, што новыя распрацоўкі, якія атрымаем дзякуючы ўкараненню тэхналагічных ліній, дадуць магчымасць выходзіць на рынкі блізкага замежжа. Таму што па суадносінах кошт/якасць гэта вельмі прымальныя канструкцыі. Гэта дасць магчымасць не толькі канкурыраваць на рынку нашай краіны, але і адпраўляць прадукцыю на экспарт", - лічыць віцэ-прэм'ер.
Адказваючы на пытанне пра ўплыў пандэміі на будаўнічую галіну, Уладзімір Кухараў адзначыў, што галіна працуе стабільна. "Вынікі пяці месяцаў паказваюць тэмп росту па будаўніча-мантажных работах 107,7 працэнта ў параўнанні з мінулым годам. Гэта сведчыць аб тым, што будаўнікі працуюць па ўсіх напрамках - жыллёвае і прамысловае будаўніцтва, будаўніцтва сацыяльных аб'ектаў, дзяржінвестпраграмы. Думаю, што задачы, якія стаяць перад будаўнічай галіной, будуць выкананы ў поўным аб'ёме ў гэтым годзе", - сказаў ён.
Завод эфектыўных прамысловых канструкцый - адзін з буйнейшых у Беларусі вытворцаў зборнага жалезабетону для прамысловага і грамадзянскага будаўніцтва. Уваходзіць у структуру дзяржаўнага вытворчага аб'яднання "Мінскбуд".-0-
