4 красавіка, Масква /Эдуард Півавар - БЕЛТА/. Краіны Еўразійскага эканамічнага саюза ў 2019-2020 гадах плануюць пашырыць выкарыстанне нацыянальных валют у разліках ва ўзаемным гандлі. Гэта прадугледжана праектам асноўных арыенціраў макраэканамічнай палітыкі дзяржаў ЕАЭС, адобраным на пасяджэнні Кансультатыўнага камітэта па макраэканамічнай палітыцы Еўразійскай эканамічнай камісіі (ЕЭК), паведамілі БЕЛТА ў прэс-службе ЕЭК.
Удзельнікі мерапрыемства разгледзелі вынікі аналітычнай работы ЕЭК і прапановы па павышэнні макраэканамічнай стабільнасці ў дзяржавах ЕАЭС, сярэднетэрміновыя арыенціры ўзгодненай макраэканамічнай палітыкі і іншыя пытанні. "Акрамя таго, члены камітэта адобрылі праект асноўных арыенціраў макраэканамічнай палітыкі дзяржаў саюза на 2019-2020 гады. Дакумент плануецца разгледзець 29 мая на пасяджэнні Вышэйшага Еўразійскага эканамічнага савета. Адзін з напрамкаў, уключаных у праект, вызначае рэалізацыю нацыянальных і інтэграцыйных мер па стварэнні ўмоў для пашырэння выкарыстання нацыянальных валют у разліках ва ўзаемным гандлі", - адзначылі ў прэс-службе.
"Прапанова па стварэнні ўмоў для пашырэння выкарыстання нацыянальных валют у разліках ва ўзаемным гандлі змешчана ў Дэкларацыі аб далейшым развіцці інтэграцыйных працэсаў у рамках саюза, падпісанай на пасяджэнні Вышэйшага Еўразійскага эканамічнага савета 6 снежня 2018 года. Яна таксама ўключана ў праект стратэгічных напрамкаў развіцця еўразійскай эканамічнай інтэграцыі да 2025 года і ў дарожную карту па іх рэалізацыі", - нагадала член Калегіі (міністр) па інтэграцыі і макраэканоміцы ЕЭК Таццяна Валавая.
Удзельнікам камітэта прадставілі агляд асноўных тэндэнцый па выніках 2018 года, нацыянальных мер эканамічнай палітыкі, якія прымаюцца дзяржавамі ў бюджэтна-падатковай і грашова-крэдытнай сферах, прагнозы эканамічнага развіцця краін саюза на наступныя тры гады і рэзультаты маніторынгу па выніках 2018 года значэнняў макраэканамічных паказчыкаў, што вызначаюць устойлівасць эканамічнага развіцця.
"Дадатная дынаміка эканамічнай актыўнасці дзяржаў ЕАЭС у 2018 годзе была падтрымана ўмацаваннем унутранага попыту і паступовым аднаўленнем інвестыцый на фоне хутказменлівых знешнеэканамічных умоў, - канстатавалі ў ЕЭК. - За апошнія некалькі гадоў краіны ЕАЭС дабіліся значных поспехаў у забеспячэнні макраэканамічнай стабільнасці, удасканаленні інстытутаў і механізмаў эканамічнага кіравання, зніжэнні валацільнасці ключавых эканамічных паказчыкаў. Гэта садзейнічала паляпшэнню макраэканамічных паказчыкаў, якія вызначаюць устойлівасць эканамічнага развіцця. Пазітыўную дынаміку мелі значэнні як балансаў бюджэтаў, так і дзяржаўнага доўгу. Інфляцыя знаходзілася на адносна невысокім узроўні і была ніжэйшай або паблізу нацыянальных мэтавых арыенціраў".
Аналіз макраэканамічнай сітуацыі ў дзяржавах - членах ЕАЭС праводзіцца ЕЭК штогод. У 2019 годзе яго вынікі стануць прадметам абмеркавання кіраўнікамі міністэрстваў эканомік дзяржаў ЕАЭС. "Правядзенне рэгулярных нарад кіраўнікоў міністэрстваў эканомік краін саюза па абмеркаванні найбольш значных пытанняў у галіне макраэканамічнай палітыкі стане важным аспектам у кантэксце выпрацоўкі рэкамендацый па павышэнні макраэканамічнай устойлівасці эканомік дзяржаў", - падкрэсліла Таццяна Валавая.
На пасяджэнні камітэта разгледзелі пытанне аб агульных падыходах да распрацоўкі і ўдасканалення бюджэтных правіл для дзяржаў - членаў ЕАЭС у мэтах збліжэння прынцыпаў нацыянальных бюджэтных правіл у адпаведнасці з лепшай сусветнай практыкай.-0-
