2 верасня, Мінск /Кар. БЕЛТА/. У Беларусі распрацаваны Нацыянальны план дзеянняў па энергаэфектыўнасці да 2030 года, паведамілі БЕЛТА ў прэс-службе Дзяржаўнага камітэта па стандартызацыі.
Кампаніяй ENVIROS s.r.o. па дагаворы з Еўрапейскім банкам рэканструкцыі і развіцця пры падтрымцы Дэпартамента па энергаэфектыўнасці Дзяржстандарту і фінансаванні Мінфіна Славакіі распрацаваны Нацыянальны план дзеянняў па энергаэфектыўнасці.
"Гэта стратэгічны праграмны дакумент, у якім вызначаны мэтавыя паказчыкі і індыкатары па энергазберажэнні да 2030 года, а таксама прапанаваны канкрэтныя тэхнічныя і арганізацыйныя мерапрыемствы для дасягнення пастаўленых мэт. План адпавядае рэкамендаванаму стандартнаму шаблону Еўрапейскага саюза з некаторымі карэкціроўкамі, якія ўлічваюць беларускую практыку", - расказалі ў прэс-службе.
Дасягненне прапанаваных мэт і рэалізацыя распрацаваных мерапрыемстваў для Беларусі не з'яўляюцца абавязковымі. Аднак дакумент дасць магчымасць вызначыць неабходныя напрамкі і канкрэтныя дзеянні для далейшага скарачэння энергаёмістасці ВУП шляхам зніжэння спажывання паліўна-энергетычных рэсурсаў (ПЭР) пры распрацоўцы дзяржаўных, галіновых і рэгіянальных праграм энергаэфектыўнасці да 2030 года.
У плане прапанавана як рэалізацыя гарызантальных (міжгаліновых, комплексных) мерапрыемстваў, прымяняльных да ўсіх сектараў эканомікі, так і ўдасканаленне існуючых напрамкаў па павышэнні энергаэфектыўнасці ў дзяржустановах, прамысловасці, транспарце, у цэнтралізаваным цеплазабеспячэнні, пры вытворчасці, перадачы, размеркаванні і збыце цеплавой і электрычнай энергіі, кіраванні попытам на энерганосьбіты. У дакуменце вызначаны аб'ёмы эканоміі ПЭР па напрамках і распрацаваны прагноз зніжэння выкідаў CO2 за кошт рэалізацыі прапанаваных мерапрыемстваў. Таксама распрацаваны прапановы па павелічэнні выкарыстання аднаўляльных крыніц энергіі нягледзячы на тое, што гэты напрамак не з'яўляецца абавязковым для стандартнага шаблону плана ў ЕС.
Асноўныя мерапрыемствы, прапанаваныя згодна з планам на 2021-2030 гады, уключаюць устараненне перакрыжаваных субсідый у сектары дамашніх гаспадарак, аснашчэнне домаўладальнікаў прыборамі ўліку электраэнергіі і газу, мадэрнізацыю вулічнага асвятлення, энергетычнае выкарыстанне цвёрдых камунальных адходаў і іншыя.
"Названыя мерапрыемствы плануецца выкарыстоўваць пры распрацоўцы стратэгічных праграмных дакументаў у галіне энергаэфектыўнасці і павелічэння выкарыстання аднаўляльных крыніц энергіі на 2021-2030 гады, нацыянальна-вызначаемых укладаў па скарачэнні выкідаў парніковых газаў і спадарожных прагнозных праграм і паказчыкаў", - адзначылі ў прэс-службе.-0-