27 студзеня, Мінск /Кар. БЕЛТА/. Працэдура закупкі з адной крыніцы поўнасцю пераведзена ў лічбавы фармат, паведамілі БЕЛТА ў Нацыянальным цэнтры маркетынгу МЗС Беларусі.
"Да гэтага часу працэдура закупкі з адной крыніцы існавала ў краіне толькі ў папяровым выглядзе. Нацыянальны цэнтр маркетынгу распрацаваў і запусціў у работу новы фармат, які падтрымлівае поўны перавод гэтай працэдуры ў лічбавы варыянт. Стала даступным правядзенне ў электронным выглядзе поўнага цыкла працэдуры закупкі з адной крыніцы", - растлумачылі ў НЦМ.
Дзякуючы новаму фармату заказчык цяпер можа правесці на электроннай гандлёвай пляцоўцы ўсе важнейшыя этапы закупкі з адной крыніцы. У лічбавым полі патэнцыяльныя ўдзельнікі падаюць прапановы, заказчыкі іх разглядаюць, тут жа праходзіць прыняцце рашэння аб выбары ўдзельніка працэдуры закупкі і заключэнне з ім дагавора.
"Кожны этап праводзімай працэдуры можна ўбачыць у адкрытым доступе ў храналогіі падзей, што забяспечвае яе максімальную даступнасць і празрыстасць", - звярнулі ўвагу ў Нацыянальным цэнтры маркетынгу.
Заказчыкі, якія ўжо апрабавалі новы фармат, адзначылі, што на арганізацыю і правядзенне працэдуры цяпер ідзе значна менш часу, таму што большасць працэсаў аўтаматызавана і не патрабуе ад заказчыка паўтарэння адных і тых жа дзеянняў. Пастаўшчыкі тавараў (работ, паслуг) ацанілі даступнасць працэдур, удзел у якіх раней абмяжоўваўся колам запрошаных заказчыкам асоб.-0-
