23 верасня, Мінск /Кар. БЕЛТА/. Сумеснае прадпрыемства па зборцы гарадскіх аўтобусаў МАЗ у Малдове плануюць запусціць у бягучым годзе. Аб гэтым паведаміў пасол Беларусі ў Малдове Анатоль Калінін у час анлайн-сустрэчы "Беларусь - Малдова: новыя этапы эканамічнага супрацоўніцтва", перадае карэспандэнт БЕЛТА.
Як адзначыў Анатоль Калінін, далейшае ўмацаванне беларуска-малдаўскага ўзаемадзеяння ён бачыць у пераарыентацыі на развіццё кааперацыйных сувязей паміж суб'ектамі гаспадарання, стварэнне сумесных вытворчасцей, рэалізацыю інвестыцыйных праектаў і пашырэнне рэгіянальнага гандлёва-эканамічнага супрацоўніцтва. "У Малдове дзейнічаюць каля 10 сумесных з Беларуссю прадпрыемстваў, збіраюцца беларускія трактары і тралейбусы. Прапанавана арганізаваць у Кішынёве зборку аўтобусаў, электробусаў і ліфтаў. Завяршаецца будаўніцтва вытворчасці па зборцы гарадскіх аўтобусаў МАЗ, якую плануецца запусціць ужо ў бягучым годзе", - сказаў Анатоль Калінін.
Чакаецца, што да канца года паставяць у Кішынёў і збяруць 35 машынакамплектаў тралейбусаў "Белкамунмаш". Акрамя таго, дасягнута дамоўленасць аб прапрацоўцы пашырэння лінейкі зборачнай вытворчасці трактароў МТЗ у Гагаузіі.
У час анлайн-сустрэчы разглядаліся актуальныя пытанні двухбаковага гандлёва-эканамічнага супрацоўніцтва ва ўмовах сучасных выклікаў, новыя фарматы работы і механізмы падтрымкі бізнесу, перспектывы пашырэння ўзаемадзеяння дзелавых колаў дзвюх краін у сельскай гаспадарцы і харчовай прамысловасці, машынабудаванні, інфармацыйных тэхналогіях, паспяховыя праекты бізнесу Беларусі і Малдовы.-0-
