19 лістапада, Мінск /Кар. БЕЛТА/. Мінск і Масква пакуль нязначна рушылі наперад у перагаворах адносна кошту расійскіх энерганосьбітаў для Беларусі. Аб гэтым у праграме "Галоўны эфір" на тэлеканале "Беларусь 1" 18 лістапада паведаміў Надзвычайны і Паўнамоцны Пасол Беларусі ў Расіі Уладзімір Сямашка, перадае БЕЛТА.
Пасол адзначыў, што нафтагазавыя пытанні застаюцца ў ліку асноўных у адносінах Беларусі і Расіі. "Па нафтагазавых перагаворах рух наперад пакуль не вельмі вялікі. Давядзецца падключацца і разам знаходзіць аргументы, даказваць", - сказаў ён, адказваючы на пытанне, з якім настроем пачынае дыпламатычную місію.
Уладзімір Сямашка нагадаў, што Беларусь шмат разоў звяртала ўвагу на парадокс: ёсць Саюзная дзяржава, ЕАЭС, разам з тым беларускія і расійскія суб'екты гаспадарання знаходзяцца ў няроўных умовах. У якасці прыкладу Уладзімір Сямашка прывёў КамАЗ і МАЗ. Калі першы плаціць 4 цэнты за кВт.гадз і каля $65 за тыс. куб. м газу, то МАЗ - 11 цэнтаў і $276 адпаведна. "У сабекошце прадукцыі абодвух прадпрыемстваў энерганосьбіты займаюць вялікую долю. Гэта апрыёры няроўныя ўмовы. Калі мы вырашым праблему зніжэння цаны на газ, на нафту, гэта вельмі дапаможа рэальнаму сектару эканомікі, прамысловасці, транспарту, сельскай гаспадарцы, камунальным службам. Дапаможа і насельніцтву", - перакананы дыпламат.-0-
