13 студзеня, Мінск /Кар. БЕЛТА/. Колькасць прыхільнікаў развіцця атамнай энергетыкі Беларусі вырасла. Аб гэтым сведчаць вынікі сацыялагічнага апытання, паведаміла намеснік дырэктара Дэпартамента па ядзернай энергетыцы Міністэрства энергетыкі Лілія Дулінец у час анлайн-канферэнцыі на сайце БЕЛТА.
"Той факт, што несумненныя перавагі атамнай генерацыі разумее і насельніцтва нашай краіны, пацвярджае праведзенае Інстытутам сацыялогіі НАН Беларусі сацапытанне. У 2021 годзе ў апытанні ўдзельнічалі 2 тыс. рэспандэнтаў, якія прадстаўляюць розныя сацыяльна-дэмаграфічныя катэгорыі насельніцтва краіны, эксперты і студэнты 1 курсаў устаноў прафесійнай адукацыі, якія навучаюцца па спецыяльнасцях атамнай энергетыкі. Праведзенае даследаванне паказала, што ў 2021 годзе 64,9 працэнта ўсіх апытаных выказалі станоўчае ў цэлым стаўленне да будаўніцтва АЭС, 25,1 працэнта - адмоўнае і 10 працэнтаў - нявызначанае ("Цяжка адказаць" і "Няма адказу"), - расказала Лілія Дулінец.
Пры гэтым сярод жыхароў Астраўца станоўчае стаўленне да будаўніцтва АЭС выказалі 72,6 працэнта рэспандэнтаў. Прадстаўнік Мінэнерга падкрэсліла, што больш высокія, чым у цэлым па краіне, лічбы не выпадковыя: будаўніцтва АЭС садзейнічае эканамічнаму і сацыяльнаму развіццю рэгіёна размяшчэння, павышэнню ўзроўню жыцця насельніцтва. "Крыху больш чым за 10 гадоў гарадскі пасёлак Астравец ператварыўся ў прыгожы добраўпарадкаваны горад. Актыўна развіваецца сацыяльная сфера - пабудаваны новая школа, дзіцячы сад, новы сучасна аснашчаны комплекс будынкаў цэнтральнай раённай бальніцы, фізкультурна-аздараўленчы комплекс, Цэнтр культуры і народнай творчасці. У горадзе актыўна вядзецца будаўніцтва жылля. Пабудавана 52 жылыя дамы - гэта больш за 210 тыс. кв.м, або 3100 кватэр", - адзначыла яна.
Пазітыўныя змяненні ў Астраўцы звязаны са з'яўленнем у горадзе магчымасці працаўладкавання (76,3 працэнта), паляпшэннем работы аб'ектаў спартыўнай накіраванасці (74,6 працэнта), павышэннем якасці тавараў і асартыменту ў гандлёвых кропках (68,5 працэнта). Таксама спрыяльныя змяненні за 2020-2021 гады назіраюцца па такіх характарыстыках, як забяспечанасць жыллём, работа грамадскага транспарту, задаволенасць жыхароў Астраўца якасцю дарог і вады.
"Атрыманыя ў ходзе сацапытання вынікі сведчаць аб замацаванні тых сур'ёзных перамен у грамадскай свядомасці і пераадоленні чарнобыльскіх комплексаў і сіндромаў, якія даволі шырока былі прадстаўлены ў грамадскай псіхалогіі яшчэ ў 2005 годзе, калі мы пачыналі праводзіць сацапытанні. Безумоўна, гэтаму садзейнічае разуменне насельніцтвам пераваг атамнай генерацыі, аб якіх мы расказваем і якія з'яўляюцца неаспрэчным фактам", - рэзюмавала Лілія Дулінец.-0-
