3 сакавіка, Мінск /Уладзімір Мацвееў - БЕЛТА/. З вялікімі расійскімі пастаўшчыкамі нафты пакуль няма дамоўленасцей, на якія разлічвае беларускі бок. Аб гэтым заявіў журналістам старшыня канцэрна "Белнафтахім" Андрэй Рыбакоў, адказваючы на пытанне БЕЛТА.
"Мы ні для каго не закрываем магчымасці па рабоце з Рэспублікай Беларусь. Прадаўжаем цесна супрацоўнічаць і весці перагаворы з вялікімі кампаніямі. Але пакуль няма тых дамоўленасцей, на якія разлічваем. Паралельна і актыўна вядзём работу па іншых напрамках. Як па самым шырокім расійскім вектары, так і па знешнім перыметры - пастаўках іншых гатункаў нафты", - сказаў Андрэй Рыбакоў.
Паводле яго слоў, трэба і ў далейшым яшчэ больш эфектыўна і плённа прадаўжаць работу па дыверсіфікацыі паставак, кантактаў і ўнутры Расійскай Федэрацыі, і з пастаўшчыкамі з іншых краін. "Планы грандыёзныя. Спадзяёмся, што не падвядзём Прэзідэнта, не падвядзём нашу галіну", - дадаў Андрэй Рыбакоў.
Як паведамлялася, Прэзідэнт Беларусі 3 сакавіка правёў нараду па пытаннях забеспячэння эфектыўнай работы нафтаперапрацоўчага комплексу краіны ў 2020 годзе і на перспектыву. Ён адзначыў, што асобныя дзяржавы зразумелі, што пры дапамозе вентыля на нафтавай трубе выгадныя ім пытанні вырашаюцца значна лягчэй. "Не думайце, што я намякаю тут толькі на Расію. Гэта стала нормай для дзяржаў планеты, якія маюць ад Госпада такое шчасце", - сказаў ён.
Аляксандр Лукашэнка канстатаваў, што цяпер краіна недаатрымлівае каля 1 млн т сыравіны штомесяц, што ўплывае на работу шэрага прадпрыемстваў. Разам з тым бягучую сітуацыю беларускі лідар лічыць нават у нечым карыснай: "Мы неапраўдана зацыкліліся на некалькіх пастаўшчыках і не маем доўгатэрміновых альтэрнатыўных крыніц сыравіны. Нафта - не манапольны тавар, і жадаючых працаваць з намі дастаткова нават у самой Расіі. Пастаўшчыкоў трэба знаходзіць, з імі трэба дагаворвацца. І гэта задача нумар адзін. Асабліва ў цяперашняй няпростай сітуацыі, якая склалася ў свеце, у тым ліку з нашым партнёрам-манапалістам".-0-
