17 студзеня, Мінск /Уладзімір Мацвееў - БЕЛТА/. Беларусь плануе ў 2019 годзе пачаць адгрузку ў Зімбабвэ тэхнікі па раней заключаных кантрактах, а таксама працуе над дасягненнем новых дамоўленасцей. Аб гэтым расказаў журналістам міністр прамысловасці Беларусі Павел Уцюпін, перадае карэспандэнт БЕЛТА.
"Кантракты заключаны. Прадугледжваецца, што ў бягучым годзе будуць пастаўлены трактары, сеялкі, прадукцыя Мінскага аўтамабільнага завода - седлавыя цягачы, паўпрычэпы. У прапрацоўцы знаходзяцца яшчэ дадатковыя кантракты па трактарах, тэхніцы БелАЗ. Перагаворны працэс завершаны, дагаворы заключаны. Цяпер выбудоўваюцца фінансавыя ўзаемаадносіны, і, я спадзяюся, пойдуць адгрузкі ў адпаведнасці з дагаворнымі адносінамі", - расказаў міністр.
Ён удакладніў, што цяпер вырашаюцца розныя пытанні па выкарыстанні інструментаў падтрымкі экспарту, фінансавага забеспячэння здзелак.
Рынак Зімбабвэ Павел Уцюпін лічыць перспектыўным па многіх напрамках, аднак нельга сказаць, што Беларусь толькі цяпер пачынае яго асвойваць. "У нас і ў 2014 годзе па лініі Міністэрства прамысловасці былі пастаўлены кар'ерныя самазвалы, пагрузчыкі. У 2017 годзе былі нядрэнныя здзелкі па пастаўках кар'ерных самазвалаў меншай грузападымальнасці", - растлумачыў ён.
Міністр адзначыў, што Зімбабвэ валодае багатымі прыроднымі рэсурсамі - вугаль, алмазы, радовішчы іншых карысных выкапняў. Таму ёсць патрэбнасць у тэхніцы, якая вырабляецца ў Беларусі. "Мы забяспечваем якасную тэхніку, сэрвіс. Гэта знаходзіць водгук у спажыўцоў. Сёння прапрацоўваецца чарговая здзелка яшчэ па пастаўцы 130-тоннікаў", - заявіў Павел Уцюпін.
Што датычыцца сельскагаспадарчай тэхнікі, міністр канстатаваў, што пастаўкі ў гэтым напрамку скончыліся ў 2008 годзе. "З-за розных прычын не было магчымасці пастаўляць. Дагаворы, якія былі заключаны ў мінулым годзе, з'яўляюцца па сутнасці стартам для таго, каб больш актыўна прыходзіць на гэты рынак і забяспечваць сельскую гаспадарку, для якой прыродныя і кліматычныя ўмовы вельмі спрыяльныя. Пастаўкі тэхнікі будуць выгадныя не толькі беларускаму боку, за кошт яе можна будзе больш істотна падняць сельскую гаспадарку Зімбабвэ", - расказаў кіраўнік Мінпрама.
Адказваючы на пытанне БЕЛТА аб магчымасці стварэння ў Зімбабвэ зборачных вытворчасцей, Павел Уцюпін не выключыў такога развіцця падзей, але падкрэсліў, што вырашэнне адпаведнага пытання ляжыць у плоскасці эканомікі, каб гэта было выгадна абодвум бакам. Міністр таксама не бачыць праблем і ў плане лагістыкі паставак прадукцыі. "Проста трэба правільна структураваць здзелкі. Няма закрытых краін - ёсць няправільна структураваныя здзелкі. Гэта залежыць ад умення і майстэрства спецыялістаў Міністэрства прамысловасці і контрагентаў на іншым баку", - дадаў ён.
Кантакты паміж Беларуссю і Зімбабвэ значна актывізаваліся і атрымалі станоўчае развіццё ў 2015 годзе. Асабістае куратарства Эмерсана Мнангагвы садзейнічала пастаўкам у краіну кар'ернай тэхнікі БелАЗ. Цяпер аснову беларускага экспарту ў Зімбабвэ складаюць калійныя ўгнаенні і запчасткі да аўтамабільнай тэхнікі. У Беларусь імпартуецца мінеральная сыравіна, а таксама цытрусавыя плады і агародніна ў нязначных аб'ёмах. У мінулым годзе прадпрыемства "Амкадор" падпісала кантракт на пастаўку ў Зімбабвэ 40 адзінак тэхнікі і запчастак амаль на $4,5 млн пры фінансавай падтрымцы Банка развіцця Беларусі і Рэзервовага банка Зімбабвэ (гэты кантракт яшчэ патрабуе падпісання банкамі). Беларускі аўтамабільны завод разам з кампаніяй "Сохра" прапрацоўвае пытанне пастаўкі партыі з шасці самазвалаў і двух пагрузчыкаў. З-за адсутнасці сродкаў у канечнага спажыўца тэхнікі бакі абмяркоўваюць механізм фінансавання здзелкі. Агракамбінат "Мачулішчы" зацікавіўся стварэннем прадпрыемства па вытворчасці і перапрацоўцы мяса і малака, прапанова накіравана зімбабвійскаму боку. Кошт праекта, калі кантракт будзе падпісаны, перасягне $26 млн.-0-
