29 сакавіка, Мінск /Кар. БЕЛТА/. У 2023 годзе па арганізацыях Міністэрства прамысловасці ў адпаведнасці з зацверджанымі бізнес-планамі развіцця арганізацый галіны прагназуецца выпуск прамысловай прадукцыі больш як на Br27 млрд. Індэкс фізічнага аб'ёму запланаваны на ўзроўні 105 працэнтаў, рэнтабельнасць продажаў - 7,5 працэнта. Аб гэтым у інтэрв'ю часопісу "Экономика Беларуси" расказаў першы намеснік міністра прамысловасці Аляксандр Агароднікаў, паведамляе БЕЛТА.
Ён адзначыў, што прамысловы сектар па-ранейшаму будзе зніжаць затраты і павышаць якасць прадукцыі. У гэтай частцы запланавана ўкараненне сучасных сістэм кіравання вытворчасцю і продажамі прадукцыі, стымуляванне ўкаранення рэсурсазберагальных абсталявання і тэхпрацэсаў.
"Стратэгія развіцця прамысловай вытворчасці прадугледжвае яе трансфармацыю ў канкурэнтаздольны комплекс, што аператыўна рэагуе на сусветную кан'юнктуру і патрэбнасці ўнутранага рынку", - падкрэсліў першы намеснік міністра прамысловасці.
У адпаведнасці з Мэтавым планам сацыяльна-эканамічнага развіцця рэспублікі на 2023 год, арганізацыямі сістэмы Мінпрама прадугледжваецца выкананне ўстаноўленых заданняў па вытворчасці прадукцыі і пастаўках прадукцыі на экспарт у натуральным выражэнні, адзначыў Аляксандр Агароднікаў.-0-
