17 мая, Мінск /Кар. БЕЛТА/. Попыт на міжнародныя перавозкі, асабліва ў расійскім напрамку, цяпер вельмі вялікі, і намеціўся пазітыўны дыялог з замежнымі калегамі ў вырашэнні гэтага пытання. Аб гэтым заявіў міністр транспарту і камунікацый Аляксей Аўраменка ў эфіры тэлеканала СТБ, паведамляе БЕЛТА.
З-за пандэміі каранавіруса новага тыпу ў мінулым годзе ва ўсім свеце значна скараціліся транспартныя зносіны, асабліва міжнародныя. Фактычна з красавіка 2020-га ў Беларусі спыніліся ўсе чыгуначныя зносіны, да мінімуму зведзены авіяперавозкі.
Паводле слоў міністра, многае было зроблена, каб захаваць калектывы і мінімізаваць наступствы. "Думаю, нам удалося, - рэзюмаваў ён. - І сёння пачынаем паступальна рухацца наперад".
Попыт на перавозкі цяпер вельмі вялікі. "Асабліва ў расійскім напрамку. Мы разумеем, што сёння нам не хапае чыгуначных і авіяцыйных зносін, пастаянна вядзём дыялог з калегамі па павелічэнні колькасці рэйсаў, павелічэнні непасрэдна чыгуначных зносін і па іншых гарадах - Масква, Санкт-Пецярбург, Сочы і г.д. Працэс даволі пазітыўны, але разам з тым узнікаюць усё новыя пэўныя рызыкі, звязаныя з пандэміяй. Спадзяёмся, што гэты паступальны рух прадоўжыцца і ў летні адпускны сезон мы ўвойдзем з добрай чартарнай праграмай, дзе будзе прапанавана даволі вялікая колькасць рэйсаў", - адзначыў Аляксей Аўраменка.
Гаворачы аб расійскім напрамку, асобна ён спыніўся на скорасным поездзе "Ластаўка", які звязаў Мінск і Маскву і курсіруе штодзень. Білеты разбіраюць хутка. "На першы рэйс, а там 349 пасадачных месцаў, білеты былі прададзены крыху больш як за 3 гадзіны", - прывёў даныя міністр.
"Ластаўка" - сумесны праект Беларускай чыгункі і РЧ. Гэта новы фармат паслуг на беларускім рынку. Дабрацца з цэнтра Мінска да цэнтра Масквы (або назад) цяпер можна ўсяго за 6 гадзін 50 хвілін, прычым рэйсы дзённыя. У эканомкласе білет каштуе Br50. Супастаўляючы цэны і паслугі - гэта сур'ёзны канкурэнт авіяперавозках паміж дзвюма сталіцамі. "Нам трэба аднавіць аб'ём перавозак, які быў, - абазначыў задачу ў авіязносінах Аляксей Аўраменка. - Попыт вялікі, і гэта ўплывае на кошт білета на самалёт". Быў перыяд, калі цана на самалёт і поезд зблізілася. Цяпер разрыў вялікі якраз з-за невялікай колькасці рэйсаў.
У цэлым сярод перспектыў развіцця авіязносін Беларусі ён назваў такія актуальныя задачы, як развіццё нацыянальнага аэрапорта і авіякампаніі як міжнароднага хаба і запуск далёкамагістральных рэйсаў (перш за ўсё ў ЗША) з замежнымі партнёрамі, падрыхтоўка праекта стварэння скорасных зносін цэнтра Мінска з Нацыянальным аэрапортам.-0-
