17 студзеня, Масква /Эдуард Півавар - БЕЛТА/. Пасол Беларусі ў Расіі Дзмітрый Крутой у ходзе сваёй рабочай паездкі ў Кемераўскую вобласць 17 студзеня правёў перагаворы з губернатарам гэтага расійскага рэгіёна Сяргеем Цывілёвым, паведамляе карэспандэнт БЕЛТА.
"Мы канстатавалі, што за апошнія два гады ў нас рэкордныя лічбы ўзаемнага тавараабароту: выйшлі ўжо на паказчык $600 млн, - сказаў Дзмітрый Крутой журналістам па выніках перагавораў. - Вядома, у структуры, і мы сёння гэта аналізавалі, у асноўным прысутнічаюць так званыя монатавары - гэта беларускія кар'ерныя самазвалы БЕЛАЗ (фактычна палавіна парку БЕЛАЗаў працуе менавіта ў Кемераўскай вобласці на прадпрыемствах Кузбаса). А ў адваротны бок, у Беларусь, мы імпартуем алюміній, вугаль, вырабы з медзі і сталі. Таму пастаўлена задача дыверсіфікавацца, пашыраць наменклатуру тавараў, і наш першы праект мультыбрэндавага цэнтра менавіта на Кузбасе мы лічым прыярытэтным".
Напярэдадні Дзмітрый Крутой пабываў на месцы стварэння мультыбрэндавага цэнтра беларускай тэхнікі. "Я ўбачыў, што ўсё ідзе нават з апярэджаннем тых графікаў, якія мы намецілі, і ў хуткім часе ў адным месцы, у адной кропцы мы зможам прадаваць не толькі кар’ерныя грузавікі БЕЛАЗ, але і пасажырскую тэхніку, трактары, камбайны і ўвесь шлейф агрэгатаў, навяснога абсталявання, шын, рухавікоў, - расказаў пасол. - Гэта для Беларусі будзе першым такім вопытам у Расіі. На тэрыторыі гэтага цэнтра мы завяршаем будаўніцтва ўжо другой чаргі вытворчага корпуса, дзе будуць праводзіцца ўсе віды рамонту, сэрвіснага абслугоўвання, будуць вялікія склады запчастак (гэта другі важнейшы элемент), і такім чынам мы зробім комплексную гісторыю падтрымкі і пашырэння беларускай тэхнікі ў Кемераўскай вобласці. Калі гэты вопыт будзе паспяховы, мы будзем яго тыражаваць на тэрыторыі Расіі".
Паводле яго слоў, другі важны блок, які абмяркоўваўся на перагаворах з губернатарам, - пералік будаўнічых праектаў у Кемераўскай вобласці, у якіх могуць удзельнічаць беларусы. Прычым размова ішла не толькі аб сацыяльных, але і аб прамысловых і сельскагаспадарчых аб'ектах. "У рэгіёна амбіцыйная праграма развіцця сельскай гаспадаркі, ужо цяпер вельмі добрыя вынікі штогадовага прыросту - па 10-15 працэнтаў, - канстатаваў Дзмітрый Крутой. - Губернатар абсалютна справядліва ставіць задачу паглыблення перапрацоўкі менавіта на Кузбасе, у прыватнасці анансаваны шэраг вельмі важных праектаў у сферы перапрацоўкі малака, і таму мая задача як пасла, як намесніка прэм'ер-міністра знайсці партнёраў і прапанаваць выгаднае рашэнне ад беларускіх вытворцаў".
Трэцім важным складнікам у супрацоўніцтве з Кемераўскай вобласцю пасол назваў развіццё турызму і ўзаемных паездак. "Тут, вядома, нам вельмі дапамог бы прамы авіярэйс Мінск - Кемерава. З першага прыбліжэння пакуль не атрымліваецца знайсці фізічна авіякампанію, якая змагла б такія пералёты ажыццяўляць. Але мы з Сяргеем Цывілёвым дамовіліся такую работу прадаўжаць. Калі спатрэбіцца потым на стадыі фарміравання эканамічных і фінансавых паказчыкаў падтрымка з боку ўрада Беларусі або ўрада Кемераўскай вобласці, мы сумесна такую схему, зразумела, прапануем", - растлумачыў ён.
У час перагавораў пасол ад імя кіраўніцтва Беларусі запрасіў Сяргея Цывілёва сумесна з бізнес-дэлегацыяй Кузбаса наведаць Мінск з візітам, прымеркаваўшы да яго правядзенне маштабных Дзён культуры Кемераўскай вобласці. Акрамя таго, бакі дамовіліся рэалізаваць шэраг сумесных ініцыятыў да дзвюх маючых адбыцца дат – 80-годдзя вызвалення Беларусі ад нямецка-фашысцкіх захопнікаў і 80-годдзя Перамогі ў Вялікай Айчыннай вайне.-0-
