24 лістапада, Белаазёрск /Кар. БЕЛТА/. Першы энергаблок БелАЭС з моманту ўключэння ў аб'яднаную сістэму ў лістападзе 2020 года ўжо выпрацаваў 5 млрд кВт.гадз электраэнергіі. Аб гэтым паведаміў сёння міністр энергетыкі Віктар Каранкевіч на сустрэчы з працоўным калектывам Бярозаўскай ДРЭС, перадае карэспандэнт БЕЛТА.
"У чэрвені гэтага года першы энергаблок БелАЭС быў уведзены ў эксплуатацыю. Усяго з моманту першай сінхранізацыі, або ўключэння ў сетку, выпрацавана 5 млрд кВт.гадз. Блок забяспечвае штосутачна выпрацоўку каля 28 млн кВт.гадз электрычнай энергіі. У сутачным вылічэнні гэта каля 25 працэнтаў ад агульнага аб'ёму выпрацоўкі электраэнергіі ў краіне", - расказаў Віктар Каранкевіч.
Паводле слоў міністра, гатоўнасць другога блока - 90 працэнтаў. "У гэтым годзе плануецца пачаць так званы этап фізічнага пуску, калі будзе забяспечаны пачатак загрузкі свежага ядзернага паліва ў актыўную зону рэактарнай устаноўкі. У 2022-м намечаны ўвод другога энергаблока ў прамысловую эксплуатацыю", - адзначыў ён.
Аб'ём выпрацоўкі электраэнергіі на БелАЭС складзе каля 18,5 млрд кВт.гадз у год. Гэта дасць магчымасць штогод замяшчаць каля 4,5 млрд куб.м прыроднага газу, зменшыць прыблізна на 7 млн т выкіды вуглякіслага газу ў атмасферу.
Віктар Каранкевіч азнаёміўся са стратэгіяй развіцця Бярозаўскай ДРЭС на бліжэйшыя гады, а таксама ходам мадэрнізацыі станцыі.-0-
