30 красавіка, Мінск /Кар. БЕЛТА/. Новы нафтаправод Гомель - Горкі дапаможа звязаць два беларускія нафтаперапрацоўчыя заводы і палепшыць лагістыку для паставак альтэрнатыўнай нафты, паведаміў карэспандэнту БЕЛТА прэс-сакратар канцэрна "Белнафтахім" Аляксандр Цішчанка.
"Нафтаправод Гомель - Горкі будзе злучаць два нафтаперапрацоўчыя заводы - Мазырскі НПЗ і "Нафтан". Гэта значыць, заводы змогуць як быццам абменьвацца рэсурсамі. Нафтаправод будуецца з перспектывай выкарыстання паставак сыравіны па паўднёвым напрамку з Адэсы або па рэверсе з Польшчы", - адзначыў Аляксандр Цішчанка.
Магістральны нафтаправод "Дружба" перад граніцай Беларусі разгаліноўваецца на паўночную і паўднёвую веткі. Пабудаваная перамычка будзе злучаць гэтыя дзве веткі па тэрыторыі Беларусі.
"Калі паўднёвая ветка ўвесь час датычылася толькі Мазырскага НПЗ, "Нафтан" мог атрымліваць альтэрнатыўную нафту толькі чыгункай, то цяпер можна будзе выкарыстоўваць паўднёвую ветку для альтэрнатыўных паставак на "Нафтан", - растлумачыў прэс-сакратар.
Калі будзе задзейнічаны рэверс з Польшчы, новы нафтаправод дасць магчымасць пастаўляць альтэрнатыўную нафту трубаправодным транспартам у тым ліку і на "Нафтан", дадаў Аляксандр Цішчанка. Цяпер такая перавага ў Мазырскага НПЗ.
Як паведамлялася, для дыверсіфікацыі паставак нафты ў Беларусь у 2020-2023 гадах будзе рэалізаваны інвестыцыйны праект па будаўніцтве магістральнага нафтаправода Гомель - Горкі, адпаведнае распараджэнне Прэзідэнт Беларусі Аляксандр Лукашэнка падпісаў 29 красавіка. Заказчыкам па праектаванні і будаўніцтве нафтаправода вызначана ААТ "Гомельтранснафта Дружба", генеральнай праектнай і генеральнай падраднай арганізацыяй - вытворчае аб'яднанне "Беларуснафта".-0-
