Аляксей Багданаў. Скрыншот відэа тэлеканала "Беларусь 1"
8 лютага, Мінск /Кар. БЕЛТА/. Міністр антыманапольнага рэгулявання і гандлю Аляксей Багданаў у эфіры тэлеканала "Беларусь 1" расказаў, чаму ўзнікла пастанова Савета Міністраў нумар 713 "Аб сістэме рэгулявання цэн" і чаму дакумент даказаў сваю эфектыўнасць, паведамляе БЕЛТА.
"Ацэньваючы гэты механізм, часта спрачаліся: рыначны механізм - добры ён ці дрэнны, - адзначыў Аляксей Багданаў. - Давайце разбірацца, чаму такі дакумент узнік і ці справіўся рыначны механізм з той сітуацыяй, у якой аказалася наша краіна ў 2022 годзе. Мы памятаем, тады парушыліся лагістычныя ланцужкі, былі праблемы з пастаўкамі, валютай, плацяжамі і гэтак далей. І самае галоўнае, цэны раслі, інфляцыя прагназавалася па выніках 2022 года каля 20 працэнтаў. Таму было прынята рашэнне стварыць сістэму рэгулявання цэн".
Аляксей Багданаў падкрэсліў, што на сённяшні момант гэта сістэма даказала сваю эфектыўнасць. "Па выніках ужо 2022 года інфляцыя была зніжана ад прагнознай амаль на 6 працэнтаў, а 2023 год, дзе мы поўнасцю адпрацавалі ўжо ў фармаце самой пастановы, нават перавыканалі план: задача была 7-8 працэнтаў, забяспечаны быў рост цэн не большы за 5,8 працэнта, - удакладніў ён. - Сапраўды, было запаволенне саміх цэн, стрымліванне цэнавай сітуацыі ў гандлі. І самае галоўнае, мы ў некаторыя месяцы наогул назіралі дэфляцыю, гэта значыць цэны зніжаліся да ўзроўню мінулага года".
"Сама пастанова, якой сёння рэгулюецца спажывецкі рынак цэнаўтварэння, пабудавана па такім прынцыпе, каб асноўная даходная частка размяркоўвалася менавіта ў бок вытворцаў як сыравіны, так і перапрацоўчых прадпрыемстваў, - падкрэсліў ён. - Таму для гандлю і пастаўшчыкоў, імпарцёраў, устаноўлены строгія ліміты гранічных надбавак, яны не могуць іх павысіць. Напрыклад, у магазіна ўстаноўлены ліміт не большы за 15 працэнтаў, ён можа толькі ніжэйшую зрабіць надбаўку. Прычым на розныя тавары дзейнічаюць розныя надбаўкі ў залежнасці ад абарачэння, жыцця тавару на паліцы. Гэта таксама неабходна ўлічваць. Мы не можам фінансава абяскровіць гандаль".
"Таму калі ў вытворца ёсць неабходнасць падняць цэны на большыя параметры, чым гэта ўстаноўлена сёння ў пастанове, механізм такі ёсць. Па-першае, неабходна даць дакладнае эканамічнае абгрунтаванне, што пайшло не так: затраты, імпартны складнік, курсавая розніца і гэтак далей. Па-другое, падаць гэта абгрунтаванне ў адпаведны дзяржорган, які і прымае рашэнне і дазваляе ў пэўных выпадках павышаць кошт больш за ўстаноўленыя пастановай параметры. Няма задачы спыніць эканамічны рост прадпрыемства", - падкрэсліў Аляксей Багданаў.-0-
