14 студзеня, Смалявіцкі раён /Кар. БЕЛТА/. Міністр сувязі і інфарматызацыі Канстанцін Шульган лічыць магчымым, што пакрыць усю Беларусь сеткай 5G можна будзе на працягу пяці гадоў. Аб гэтым ён расказаў сёння журналістам на прэзентацыі тэхналогіі 5G у Кітайска-беларускім індустрыяльным парку "Вялікі камень", перадае карэспандэнт БЕЛТА.
Пакуль няма канчатковага рашэння, калі менавіта пачнуць укараняць 5G. Міністр нагадаў, што пры Саўміне створана рабочая група па 5G, каб улічыць усе асаблівасці ўкаранення новай тэхналогіі. "У лютым мы будзем рыхтаваць падагульняючую справаздачу, каб далажыць кіраўніку дзяржавы і падыходзіць да этапу прыняцця рашэння. Яшчэ наперадзе працэдура выдзялення частот - магчыма, будуць конкурсы або іншыя варыянты, мы іх прапрацавалі", - растлумачыў Канстанцін Шульган.
На яго думку, у Беларусі склаліся "ўнікальныя ўмовы" для ўкаранення 5G, і нават тыя, хто пачаў займацца гэтай тэмай раней, маштабіраваць на ўсю краіну гэту тэхналогію пакуль не могуць. "Нашы ўмовы гэта дазваляюць. Адзін з варыянтаў - на працягу пяці гадоў пакрыццё ўсёй краіны. Такія планы ёсць, і мы будзем над гэтым працаваць", - сказаў міністр.
Канстанцін Шульган адзначыў, што ўкараненне тэхналогіі абыдзецца ў немалую суму, таму ўдзельнічаць могуць і інвестары. "Гэта сотні мільёнаў. Вы цудоўна разумееце, што з бюджэту такія грошы выдзеліць камусьці - нават паважанаму "Белтэлекаму" - напэўна, неэфектыўна і няправільна, г.зн. канкурэнцыя павінна быць. У нас дастаткова моцныя аператары сувязі, і ў гэтых сіл ёсць фінансавыя магчымасці, якія дазволяць, я спадзяюся, рэалізаваць праект, - адзначыў ён. - Мы адкрыты - вы бачыце ўдзел Huawei, няхай прыходзяць і іншыя".-0-
