29 ліпеня, Мінск /Кар. БЕЛТА/. Мінскі аўтазавод прадставіў сваю тэхніку ў Грозным, паведамілі БЕЛТА ў прэс-службе прадпрыемства.
На выстаўцы прадстаўлены мабільны офіс МАЗ-Купава 673110, які можна прыстасаваць пад любое кампановачнае рашэнне паводле заказу кліента. "Ён запатрабаваны пры рабоце на аддаленых аб'ектах у розных рэгіёнах, дзе трэба забяспечыць камфортныя ўмовы для перагавораў. Мабільны офіс складаецца з трох блокаў: перагаворнага памяшкання, кухні і санітарнага пакоя. Напаўненне офіса - тэлевізар, ноўтбук, Wi-Fi-маршрутызатар, эрганамічная мэбля і сістэма ацяплення і кандыцыяніравання. Кухонны блок абсталяваны камбінаванай газавай плітой з мыйкай, ёмістасцямі з вадой, халадзільнікам і шафамі для захоўвання і перавозкі прадуктаў харчавання", - расказалі ў прэс-службе.
Акрамя таго, шырока прадстаўлена лінейка камунальнай аўтатэхнікі. У прыватнасці, смеццявоз МАЗ-5907С2, здольны за раз загрузіць, ушчыльніць і вывезці на палігон каля 7,5 т адходаў. "Ён умяшчае 17 куб.м бытавых адходаў, яшчэ 1,8 куб.м умяшчае загрузачная ёмістасць задняга борта. Кузаў выкананы ў форме эліпса без дадатковых узмацняльных рэбраў. Спецмашына можа даставаць смецце з кантэйнера любой формы і памеру. Пасля загрузкі спецыяльны механізм яго прасуе пад высокім ціскам", - паведамілі на прадпрыемстве.
Таксама на выстаўцы прэзентаваны аўтамабіль-самазвал МАЗ-65012В, прызначаны для перавозкі сыпучых грузаў. "Дапушчальная поўная маса машыны - 33,5 т, грузападымальнасць - 20 т. Аб'ём П-падобнай платформы складае 15,4 куб.м. На аўтамабілі ўстаноўлены рухавік магутнасцю 330 к.с. экалагічнага класа Еўра-5, каробка перадач - 12-ступеньчатая. Аб'ём паліўнага бака складае 300 л", - адзначылі ў прэс-службе.
Яшчэ адзін прадстаўнік лінейкі будаўнічай тэхнікі - аўтамабіль-самазвал на базе шасі МАЗ-651628 з колавай формулай 8х4 для перавозкі інертных грузаў (пясок, вугаль, гравій, асфальт) па дарогах агульнага карыстання. "Дапушчальная поўная маса - 44,8 т, грузападымальнасць - 32 т. На машыне ўстаноўлены самазвальны кузаў аб'ёмам 23 куб.м. На аўтамабілі прымяняецца рухавік WP12.430E50 экалагічнага класа Еўра-5, агрэгатаваны ў пары з 12-ступеньчатай каробкай перадач", - расказалі на заводзе.
Акрамя таго, на выстаўцы прадэманстравана навінка - кран новага пакалення МАЗ-5576BY-C-22 на шасі МАЗ-6312С3 з колавай формулай 6х4. "Аўтакран абсталяваны рухавіком ЯМЗ-53623 экалагічнага класа Еўра-5 і 9-ступеньчатай каробкай перадач. Поўная маса складае 27 т. Кран аснашчаны авоіднай стралой з максімальным вылетам 30 м і вышынёй пад'ёму 31,8 м", - дадалі ў прэс-службе.
Мінскі аўтамабільны завод - адно з буйнейшых беларускіх машынабудаўнічых прадпрыемстваў, якое спецыялізуецца на выпуску велікагрузных аўтамабіляў, спецтэхнікі, аўтобусаў, тралейбусаў і прычапной тэхнікі. Тэхніка адпавядае экалагічным стандартам Еўра-3, 4, 5 і 6. З канвеера завода сыходзяць седлавыя цягачы, бартавыя аўтамабілі, шасі пад устаноўку рознага спецабсталявання - усяго больш за 500 мадэлей і 3 тыс. мадыфікацый.-0-
