28 верасня, Мінск /Кар. БЕЛТА/. У Беларусі да 2025 года плануюць нарасціць вытворчасць мясной прадукцыі да 2 млн т. Аб гэтым на адкрыцці форуму "Беларусь аграрная. Мясная ферма" заявіў журналістам намеснік міністра сельскай гаспадаркі і харчавання - дырэктар Дэпартамента ветэрынарнага і харчовага нагляду Мінсельгасхарча Іван Смільгінь, перадае карэспандэнт БЕЛТА.
Працэнт беларускіх мясных і малочных прадуктаў на прылаўках нашых магазінаў складае 99 працэнтаў - 99,9 працэнта. "Мы паспяхова забяспечваем харчовую бяспеку Беларусі. На гэты момант атрымліваем 835 кг малака на душу насельніцтва - гэта ў 3-4 разы вышэй за патрэбнасць. Мясной прадукцыі на аднаго чалавека вырабляецца 135 кг, што на 34,6 працэнта вышэй за ўзровень спажывання. Міністэрству сельскай гаспадаркі і харчавання, а таксама па праграме "Аграрны бізнес" пастаўлена задача нарасціць да 2025 года вытворчасць мясной прадукцыі да 2 млн т. Па выніках 2021 года гэты паказчык складаў 1,8 млн т", - расказаў намеснік міністра.
Экспарт сельскагаспадарчай прадукцыі за 7 месяцаў гэтага года склаў амаль $4,4 млрд, з ростам больш за 126 працэнтаў да ўзроўню мінулага года. "Геаграфія паставак расце з году ў год. Па выніках мінулага года малочную прадукцыю мы пастаўлялі ў 50 краін свету, мясную - у 30 краін. Таму, нягледзячы на санкцыі, у частцы экспартных паставак праблем няма", - падкрэсліў Іван Смільгінь.
Акрамя таго, ён звярнуў увагу, што перад вытворцамі беларускай прадукцыі ставіцца задача забяспечваць біябяспеку нашых жывёлагадоўчых аб'ектаў. "Будзе біябяспека - будзе эпізаатычная стабільнасць, вытворчасць і экспартны патэнцыял", - дадаў ён.
Міжнародны галіновы форум "Беларусь аграрная. Мясная ферма" праходзіць у Мінску. Мерапрыемства прысвечана пытанням жывёлагадоўлі, птушкагадоўлі, свінагадоўлі, племянной справы, ветэрынарыі, а таксама кааперацыі сельгаспрадпрыемстваў. На працягу дня ў рабоце спецыялізаваных секцый форуму прымуць удзел аўтарытэтныя эксперты з рэальнымі кейсамі, практычнымі рэкамендацыямі і рашэннямі. Усяго ў мерапрыемстве прымаюць удзел 360 дэлегатаў.-0-
