23 снежня, Мінск /Кар. БЕЛТА/. Міністэрства працы і сацыяльнай абароны пракаменціравала асобныя змяненні ва ўказ Прэзідэнта Рэспублікі Беларусь ад 18 студзеня 2019 года нумар 27 "Аб аплаце працы работнікаў бюджэтных арганізацый", паведамляе БЕЛТА.
Змяненні ўнесены ўказам ад 22 снежня 2020 года нумар 482. Перш за ўсё павялічваецца памер сродкаў, якія накіроўваюцца на прэміраванне. "З 1 ліпеня 2021 года прадугледжваецца павелічэнне памеру сродкаў, што накіроўваюцца на прэміраванне, з 5 працэнтаў да 20 працэнтаў у рамках прадугледжаных бюджэтных асігнаванняў на аплату працы. Гэта мера дасць магчымасць павялічыць долю прэміравання ў аб'ёме стымулюючых выплат работнікам бюджэтных арганізацый", - растлумачылі ў Мінпрацы.
Таксама павялічваецца памер аднаразовай выплаты на аздараўленне - як мера дадатковай сацыяльнай падтрымкі работнікаў. "Пры адыходзе ў водпуск з 1 студзеня 2022 года адбудзецца павелічэнне памеру аднаразовай выплаты на аздараўленне з 0,5 да 1 акладу ў год. Адначасова прадугледжваюцца тэхнічныя праўкі па прывядзенні ўказа нумар 27 у адпаведнасць з нормамі Працоўнага кодэкса", - дадалі ў Мінпрацы.
Дарэчы, у бягучым годзе назіраецца апераджальны тэмп росту заработнай платы ў бюджэтнай сферы над тэмпамі росту заработнай платы ў краіне. Так, за студзень-лістапад тэмп росту намінальнай налічанай заработнай платы работнікаў бюджэтных арганізацый у параўнанні з адпаведным перыядам 2019 года склаў 119,2 працэнта (па краіне - 113,8 працэнта), рэальны тэмп росту - 113,1 працэнта (па краіне - 108 працэнтаў). "Суадносіны зарплаты бюджэтнікаў з нарастаючым падрахункам і сярэдняй зарплаты па краіне на працягу практычна ўсяго 2020 года знаходзіцца на ўзроўні 80 працэнтаў", - адзначылі ў ведамстве.
Нагадала Мінпрацы і аб тым, што з 1 студзеня 2021 года базавая стаўка ўстаноўлена ў памеры Br195 (тэмп росту да 2020 года - 105,4 працэнта), пры гэтым у далейшым на працягу года плануецца правесці паўторнае павышэнне гэтага нарматыву з улікам паступлення дадатковых даходаў у бюджэт. Мінімальная заработная плата павялічыцца да Br400 (да 2020 года - 106,7 працэнта).-0-
