18 студзеня, Мінск /Кар. БЕЛТА/. Верхнія радкі ў абноўленым рэйтынгу дзелавой актыўнасці Беларускай універсальнай таварнай біржы за IV квартал 2020 года занялі металургічныя заводы, нафтатранспартныя кампаніі, дрэваапрацоўчыя прадпрыемствы і аграхолдынгі, паведаміў карэспандэнту БЕЛТА прэс-сакратар БУТБ Раман Яніў.
Рэйтынг разлічваецца зыходзячы з аб'ёму і колькасці здзелак, заключаных удзельнікам біржавых таргоў на працягу справаздачнага перыяду, і абнаўляецца па выніках кожнага квартала. "Самым актыўным прадаўцом у секцыі металапрадукцыі стаў адзін з вядучых расійскіх вытворцаў стальных зварных труб - АТ "Выксунскі металургічны завод", а пакупніком - айчыннае нафтатранспартнае прадпрыемства ААТ "Гомельтранснафта Дружба", - расказаў Раман Яніў.
Рэйтынг дзелавой актыўнасці па секцыі лесапрадукцыі ўзначалілі дзве літоўскія кампаніі - UAB Eurovesta і AB Klaipedos Mediena. Першая стала буйнейшым пакупніком беларускіх піламатэрыялаў, а другая - шчэпак і драўняных адходаў.
"У секцыі сельгаспрадукцыі на самай высокай пазіцыі ў рэйтынгу пакупнікоў размясцілася ААТ "Агракамбінат "Скідзельскі", які набываў на біржавых таргах шрот алейных культур. Самым актыўным прадаўцом стала падраздзяленне расійскай групы кампаній "Садружнасць" - ТАА "Садружнасць-агратрэйд", што спецыялізуецца на вытворчасці і рэалізацыі рапсавага шроту.
"Лідарам сярод пакупнікоў у секцыі прамысловых і спажывецкіх тавараў стала ААТ "Брэсцкі мясакамбінат", якое закупляла праз БУТБ абалонку для вытворчасці каўбас. Што датычыцца статусу буйнейшага прадаўца, то яго атрымаў навічок рэйтынгу дзелавой актыўнасці - ПП "ТыгерЛесЭкспарт", што займаецца пастаўкамі транспартна-пагрузачнай тэхнікі для лясной галіны", - дадаў прэс-сакратар.
ААТ "Беларуская ўніверсальная таварная біржа" створана ў 2004 годзе. Першыя таргі адбыліся ў чэрвевні 2005 года. БУТБ - адна з буйнейшых таварных біржаў ва Усходняй Еўропе. Галоўная функцыя біржы - садзейнічанне беларускім прадпрыемствам у экспарце прадукцыі і дапамога замежным кампаніям у выхадзе на беларускіх рынак. На біржы прадаюцца метала-, леса-, сельгаспрадукцыя, прамысловыя і спажывецкія тавары шырокай наменклатуры.-0-
