13 студзеня, Мінск /Кар. БЕЛТА/. Новыя падыходы да арганізацыі і правядзення дзяржаўных закупак дадуць магчымасць у першы ж год іх дзеяння сэканоміць для бюджэту каля Br1 млрд. Аб гэтым расказаў сёння журналістам міністр антыманапольнага рэгулявання і гандлю Аляксей Багданаў, перадае карэспандэнт БЕЛТА.
"Рэальная эканомія сродкаў даволі вялікая - да мільярда рублёў у першы год", - сказаў Аляксей Багданаў.
Праект новага ўказа па ўдасканаленні заканадаўства ў галіне закупак быў разгледжаны на нарадзе ў кіраўніка дзяржавы. Паводле слоў Аляксея Багданава, мяркуемыя новаўвядзенні дадуць магчымасць сэканоміць бюджэтныя сродкі і павялічыць долю айчынных тавараў пры дзяржзакупках. "Першае, што прапануецца, - забарона на ўдзел у дзяржзакупках афіліраваных асоб", - сказаў міністр. Ён адзначыў, што менавіта афіліраваныя змовы - адзін з карупцыйных складнікаў, які прыводзіць да значнага завышэння цэн.
Праект указа быў у цэлым адобраны кіраўніком дзяржавы, засталося дапрацаваць толькі пару тэхнічных нюансаў, расказаў Аляксей Багданаў. Да канца лютага дакумент павінен быць унесены на падпісанне.
"Каб зрабіць больш строгім кантроль за пастаўшчыкамі паслуг у дзяржзакупках, прапаноўвалася тых людзей, якія дапусцілі правапарушэнні, выплачваючы зарплату ў канвертах, не дапускаць да дзяржзакупак. Але як іх не дапускаць, калі базы такой няма? Хто будзе яе весці, як яе весці? Мы згодны гэта ўсё зрабіць, але ёсць тэхнічныя пытанні: як гэта пастаянна абнаўляць, хто гэтым будзе займацца? Рашэнне прынята не было", - растлумачыў міністр антыманапольнага рэгулявання.
Таксама больш дасканала трэба прапрацаваць пытанне вядзення базы афіліраваных асоб. Аднак на вырашэнне гэтага пытання можа спатрэбіцца больш часу. "Паводле даных міжнароднай статыстыкі, пры змове яны даюць завышэнне кошту недзе на 20 працэнтаў. Дзве кампаніі прыйшлі - паспрабуй іх вылічылі. А цяпер конкурсныя камісіі будуць запытваць у іх даныя і адсочваць", - дадаў Аляксей Багданаў.
Як падкрэсліў у час нарады Прэзідэнт, сістэма закупак заўсёды была аб'ектам яго пільнай увагі, паколькі з'яўляецца адным са значных інструментаў эканамічнай палітыкі. "Мной не раз даваліся даручэнні аб яго выкарыстанні для павышэння канкурэнтаздольнасці эканомікі, эфектыўнага расходавання грашовых сродкаў і недапушчэння розныя шэрых схем, - сказаў Аляксандр Лукашэнка. - Аднак пры любых навацыях павінна быць забяспечана бесперабойнасць працэсаў у гаспадарчай дзейнасці прадпрыемстваў з адначасовай эканоміяй грашовых сродкаў".-0-
